Faka’ilonga’i kau Faiako ‘e toko 19 lava ‘enau faifatongia

E-mail Print PDF

1 Fepueli 2016 Na’e foaki atu ‘e he ‘Eiki Palēmiá ka ko e Minisitā Akó ‘Akilisi Pōhiva ki he kau Faiako ‘e toko 19 ha ngaahi pale fakalāngilangi ‘i he lotu Fakatahataha ‘a e Potungāue Akó ‘a ia na’e fakahoko ‘i he Falaite, 29 'o Sanuali ‘i he Holo Fakamanatu Kuini Sāloté.

Ko e penisoni ‘eni ‘a e kau Faiako ko ‘ení hili ia ha lava ha ta’u ‘e 30-40 ‘a ‘enau fai fatongia ma’ae Potungāue Akó.

Na’e me’a foki ‘i he Polokalama Lotu Fakatahataha mo e Palesiteni ‘o e Siasi Tonga Tau’atāiná, Rev Semisi Fonua ‘a ia na’á ne fakahoko ‘a e lotu fakatāpui ‘o e ‘ahó.

‘I he me’a ‘a e ‘Eiki Minisitā Hon. ‘Aikilisi Pōhiva ka ko e Palēmia ‘o Tonga, na’á ne fakalotolahi’i ‘a e kau Faiako lolotonga ‘i he Potungāue ‘o tō ‘ene fakamamafá ki he fakahoko ‘a honau fatongiá ‘aki honau lotó mo honau ‘atamaí.

“ngaohi ho loto moe ‘atamaí koho pule’anga ia ke fokotu’u taloni ai ho ngāué ,”

“’Ko e ‘asenita ‘o ‘etau ngāué ko e ‘asenita ia ‘a Sihova, kuopau ketau muimui ai..pea toki tānaki atu kiai e me’a kehekehe ‘o fakataumu’a pē ki he lelei fakalukufuá ‘o e nofó.”

Taimi tatau pē na’á ne tanaki atu kiai mo e lau ‘a e himi ‘o e Lotu Fakatahatahá “’Eiki keke fakatupu ha ‘atamai vavalo keu le’o ‘o tali tu’u ‘o teke ke mama’o….”

‘Ikai ngata aí ka na’a ne fakahā ‘oku totonu ke ma’u ‘e he kau Faiakó ha loto fie ngāue mo ha ngāue ‘oku tu’uloa.

“Ko e taukei mo e ako na’e fakahoko ‘i he Kolisi Fakafaiako ‘e ‘ikai fe’unga ia kapau he ‘ikai ke to’o ia ‘o fakanaunau’aki ‘a lokiako pea kapau he ‘ikai ke tau fakahoko ia ‘e ‘ikai ‘aonga ‘a ‘etau ngaahi taukei koia ki hono ako’i ‘a e kaha’u ‘o e fonuá.”

‘I he lea fakamālō ‘o e ‘ahó, na’e fakamamafa’i ai ‘e he Talēkita ‘o e Potungāue Akó, Dr. Raelyn ‘Esau ‘a e ngāue lahi kuo lava ‘e kinautolu kuo nau lava’i lelei ‘enau fua fatongia ‘i he Potungāué ‘i he vaha’a taimi na’a nau fai fatongia aí.

Na’á ne talamonū foki kia kinautolu mo e hoko atu ‘a e kaha’u ‘o ‘enau mo’uí.

Na’e ‘iai foki mo e ngaahi pale kehe na’e foaki ‘o kau ai ‘a e ngaahi Lautohi Pule’anga na’á nau tu’ukimu’a ‘i he Sivi Hū ki he Ngaahi Kolisí. ‘O kau ai ‘a e Lautohi Pule’anga ‘o Tu’aliku ‘o Pilolevú, Lautohi Pule’anga ‘o Fangá pea mo e Lautohi Pule’anga ‘o Nuku’alofá.

NGATA'ANGA

Last Updated ( Tuesday, 02 February 2016 11:01 )  

Who's Online

We have 234 guests online

CONSULATES/EMBASSIES

PUBLIC ENTERPRISES