Home / PRESS RELEASE / ENGLISH VERSION / Pa’anga tokoni fakakātoa ‘e $21 miliona ki he fakaakeake hili ‘a e saikolone ko Gita

Pa’anga tokoni fakakātoa ‘e $21 miliona ki he fakaakeake hili ‘a e saikolone ko Gita

E-mail Print PDF

07 ‘o Ma’asi, 2018 ‘I he’ene a’u mai ki he Falaite uike kuo ‘osí ‘oku fe’unga mo e pa’anga tokoni ‘e 21 miliona kuo ma’u ‘e he Pule’anga Tongá mei he ngaahi fonua mulí pehē foki ki he ngaahi kautaha mei tu’apule’angá ki he fakaakeaké hili ko ia ‘a e saikolone ko Gita. ‘Oku fakafuofua ki he $12 miliona ‘a e ngaahi naunau tokoni kuo’osi a’u taki mai ‘e he ngaahi Pule’anga mulí talu mei he ‘osi ko ia ‘a e saikolone.

Fakatatau ki he fakamatala ‘a e ‘Ofisa Pule Ngāue ‘a e Potungāue MEIDECC Paula Ma’u, ko e ngaahi ngāue ki he pa’angá fakatatau ki he laό ‘oku ‘i he malumalu pe ia ‘o e ‘Eiki Ministā Pa’angá ke ne toki tufotufa mai ‘a e pa’anga tokoni ko iá.

‘I he taimi tatau na’a ne fakahā foki na’e ‘osi fakahū atu ‘a e ngaahi lipootí ki Fale Alea ‘aneafí fekau’aki mo e ngaahi ngāue kuo fakahoko hili ‘a e matangi. Na’e fakahoko ai pe ai ‘a hono fakama’ala’ala ‘e he ‘Eiki Minisitā ‘o e Potungāue Hon. Poasi Teí ki he Hou’eiki Kapinetí ‘a e tu’unga ‘oku ‘i ai ‘a e ngāue.

“Ko e ngaahi lipooti na’e fakahū atu ki he fale aleá na’e kau kiai ‘a e ngaahi lipooti talu mei he fika 1 (situation report) ‘o a’u mai ki he fakamuimui taha pehé ki he ngaahi responsive plan pē ko e ngaahi palani ‘eni na’e fa’u hili koia ‘a e uike na’e tō mai koia ‘a e matangí pea ko e fika na’e ‘asi ai ko e $40 miliona.”

Na’a ne fakamatala foki felave’i pea mo e ngaahi fakafuofua kuo ‘omi mei ngaahi komiti si’i.

“’Oku mahino mai ‘oku lolotonga fai e ngāue ki hono fakalelei’i ‘o e ngaahi palaní tupunga mei he ngaahi fika fakamuimui taha kuo a’utaki mai. ‘A ia ‘oku toe ‘alu hake ai ‘a e ngaahi fiká ki he pa’anga ‘e $64 miliona kae hange pē ko ia na’e me’a ‘aki ‘e he ‘Eiki Minisitā ‘i fale alea ko e pa’anga pe ia ‘oku ma’u he taimi ní.”

NGATA’ANGA

Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea, mo e Fetu’utaki.

 

Who's Online

We have 259 guests online

CONSULATES/EMBASSIES

PUBLIC ENTERPRISES