Home / PRESS RELEASE / ENGLISH VERSION / Vakapuna tokoni ‘e fā mei ‘Aositēlēlia mo Nu’u Sila kuo tu’uta ‘i Tonga ni hili ‘a e saikoloné

Vakapuna tokoni ‘e fā mei ‘Aositēlēlia mo Nu’u Sila kuo tu’uta ‘i Tonga ni hili ‘a e saikoloné

E-mail Print PDF

16 Fepueli 2018 Kuo a’u ‘eni ki he vakapuna tokoni ‘e fā kuo tū’uta ‘i Tongatapú ni hili ‘a e Saikolone Fakatalopiki ko Gita.

‘I he fakataha hono tolu ‘a e Kōmiti ki hono Tokangaekina ‘o e Fakatamaki Fakaenatulá pea mo e ngaahi kautaha ongoongó  na’e fakahā ‘e he ‘Ofisa Pule Ngāue ‘a e Potungāue MEIDECC Paula Ma’u ko e vakapuna tokoni ‘e ua mei Nu’usila pea ko e ua mei ‘Aositelēlia. ‘Oku ‘i ai foki mo e ngaahi tokoni ‘oku kei ha’u pē mei he ongo fonuá.

Ko e tu’unga foki ‘oku ‘i ai ‘a e ma’u’anga ‘uhilá mo e vai, ‘oku fakalakalaka ki mu’a ‘a e ngāue fakatatau ki he fakamatala ‘a e Talēkita ‘o e NEMO Leveni ‘Aho.

Kuo ‘i ai ‘a e konga lahi ‘o e ngaahi ngāue’angá kuo ulo ‘a e ‘uhilá pea lele lelei mo e vaí foki. Ko e vaí kuo ‘osi fakahoko ‘a hono fakalelei’i ‘a Mata-ki-’eua, pea kuo a’u ai ‘a e vaí ki Popua pea mo e konga ‘o e Hala ByPass. ‘Oku kei fakahoko fatongia houa ‘e 24 ‘a e Kautaha ‘Uhila ‘a Tongá ki hono fakavave’i ke a’u ‘a e ngaahi ma’u’anga ivi ki he ngaahi tukui koló.

Na’a ne fakahā foki na’e mavahe atu ‘i he hoko ‘a e valu ‘o e pongipongí ni, ‘a e vaka ‘a e kau sōtiá ki ‘Eua mo e ngaahi tokoni. Ko e konga lahi ‘o e ngaahi tokoni ko ‘ení ko e tapoleni, shelter kit pea mo e tēniti.

Taimi tatau na’e pehē ‘e he ‘Ofisa Pule Ngāue ‘a e Potungāue Mo’uí Dr. Siale ‘Akau’ola na’e lava ‘a e 75% hono fakahoko ‘a e savea ‘i Tongatapú ni ki he tu’unga ‘oku ‘i ai ‘a e vaí, ma’á pea mo e mo’ui leleí. Na’e kau mai ki he savea ko ‘ení ‘a e timi mei Nu’usila, ‘Aositelēlia, Kautaha Mo’ui ‘a Māmāni, Kolosi Kulá pea mo e NEMO.

Na’e mahino mai ko e 50% ‘o e vaí ‘i he ngaahi koló ‘oku fakalele he ‘uhilá. ‘Oku mahino mai foki ‘a e ngaahi palopalema ‘e hoko ki he kakai ‘oku nau nofo he feitu’u ‘oku anoano. ‘Oku ‘i ai ‘a e fiema’u mei he tafa’aki ‘o e Potungāue Mo’uí ke hiko fakavavevave ‘a e vevé tatau pē ki he ngaahi feitu’u kotoa ‘i Tongatapú ni ke fakasi’isi’i ‘a e fanafanau ‘a e namú pea mo e lango foki.

‘Oku ‘i ai foki mo e tokanga ki he ngaahi Senitā Mo’ui Fakavahé ke ‘i ai ha ‘aisi mokomoko ‘a ia ‘e lava ke tuku ai ‘a e ngaahi faito’ó ‘o tautefito ki he faito’o ‘a e kakai ‘oku nau mo’ua he mahaki suká.

‘Oku kei hokohoko atu pē foki ‘a hono fakataputapui ‘o loto Nuku’alofa mei he taimi valu efiafi (8pm) ki he 8:00 pongipongi (8am).

‘I he fakamatala mei he Tokoni Talēkita Ako Ma’olunga mei he Potungāue Akó, Ponapate Taunisila, ‘oku kei fakahoko e fengāue’aki mo e palani ‘a e ngāue ki he ngaahi ‘apiakó, ka ko e fiema’u ‘i he taimí ni, ke fakahaofi ‘a e ngaahi naunau ‘oku kei malava ke ngāue’aki mei he ngaahi ‘apiako na’e uesiá.

‘E toe fakahoko pē ‘a e fakataha tatau ‘i he Tūsite ‘o e uike kaha’ú.

NGATA’ANGA

Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea, mo e Fetu’utaki.

 

Who's Online

We have 445 guests online

CONSULATES/EMBASSIES

PUBLIC ENTERPRISES