Home / PRESS RELEASE / ENGLISH VERSION / Fakataha Hono Ua ‘a e Pule’angá pea mo e kau faiongoongó hili ‘a e Saikolone Fakatalopiki ko Gita

Fakataha Hono Ua ‘a e Pule’angá pea mo e kau faiongoongó hili ‘a e Saikolone Fakatalopiki ko Gita

E-mail Print PDF

15 ‘o Fepueli, 2017 Na’e fakahoko ‘i he efiafi ‘o e’aho ní ‘a e fakataha hono ua ‘a e Kōmiti Fakafonua ki hono Tokangaekina ‘a e Ngaahi Fakatamaki Fakaenatulá mo e kau faiongoongó ke tuku mai ‘a e ngaahi fakamatala fakamuimui taha felāve’i pea mo e ngaahi tokoni kuo lava ‘o fakaa’u ki he kakai ne uesiá hili ‘a e ngaahi maumau lahi na’e fakahoko ‘e he matangi fakatalopiki ko Gita.

Na’e fakahā ‘e he ‘Eiki Minisitā ‘a e Potungāue Mo’uí Hon. Saia Piukala ‘oku lolotonga fakahoko ngāue atu ‘a e Kautaha ‘Uhilá ki he ‘uhila ‘a e Pangikē BSP mo e ‘Ofisi Palēmiá. ‘Oku ‘osi ‘i ai foki ‘a e ngaahi pausa e ni’ihi kuo ’osi lava fakahoko ki ai ‘a e ‘uhila ‘aki ‘a e tokoni mei he ongo kautaha ko e Total mo e Pacific Energy ke fakafaingamalie’i ‘a e ngaahi fiema’u ‘a e kakai e fonuá.

Na’a ne lave foki ko e taha ‘a e ngaahi sēvesi mahu’inga ki he kakai ‘o e fonuá ko e ‘uhilá pea mo e vaí, he ‘oku ‘i ai ngaahi feitu’u kuo’osi mo’ui ai ‘a e ‘uhilá hangē ko e Pangikē ANZ, Tungi Colonnade, St. George Palace pea mo e Uafu Kuini Sāloté.

Kuo ‘osi faka’atā foki mo e mala’e vakapuná ki he fepuna’aki fakatu’apule’angá pea ke fakahoko ai mo e fepuna’aki fakalotofonuá makatu’unga eni ‘i he maumau lahi ne hoko ki he mala’e vakapuna fakalotofonuá. ‘I he taimi tatau ‘oku kei hokohoko atu pe ‘a e ngāue ‘a e Kautaha ‘Uhilá ke fakakakato e ngaahi fatongia ki he mala’e vakapuná.

Fakatatau ki he fakamatala ‘a Hon. Piukala, ko e palopalema ko ia ne tupunga mei ai e motuhia ‘a e fetu’utaki ‘a e TBC moe TCC, na’e pā ‘a e generator ‘aneafí ka kuo ‘osi fakahoko ki ai ‘a e ngāue ‘a e ‘uhilá ke fakakakato e ngaahi sēvesi mahu’inga ko iá ki he fonuá

‘Oku ‘amanaki foki ke fakahoko ha fepōtalanoa’aki ‘a e Kautaha ‘Uhila ‘a Tonga ni pea mo Nu’usila  mo ‘Aositelelia ki ha tokoni fakapa’anga kae pēhē foki ki he tokoni fakakaungāue ke toe fakavavevave’i ange a e fakahoko fatongiá ke fakasi’isi’i ‘a e ngaahi palopalema ‘oku tau lolotonga fehangahangai mo ia he taimi faingata’a ko ‘ení.

Na’a ne fakahā foki ko e me’a mahuinga ‘eni ko e lava ke fakahoko fatongia ‘a e Poate Vaí ke lele atu ‘a e vaí ki he kakai ‘o e fonuá ke fakasi’isi’i ‘a e palopalema ‘i he tafa’aki ko iá.

Na’a ne fakamatala foki ne ‘i ai ‘a e lipooti mei he ngaahi feitu’u ‘oku ‘i ai ‘a e ngaahi ma’u’anga vai ‘oku palopalema ‘enau misini vaí pea na’e puhi’i ‘a e ngaahi tangikē vaí ‘e he afaá pea ‘e tufotufa  atu ki he ngaahi kolo ko ení ha ngaahi tangikē fo’ou.

Na’e lava atu foki aneafi ha ongo toketa ‘e ua ke fakahoko ha sio ki he falemahaki ‘o ‘Euá mo kinautolu ne lavelaveá. ‘I he’ene lavé ko e lipooti na’e ma’u maí ‘oku ‘i he tu’unga fakafiemalie ‘a e kau laveá pea na’e ‘i ai pē ‘a e tokotaha na’e fiema’u ke ‘omai fakafalemahaki ki Vaiola pea ‘oku fakafolau mai ia he efiafi ni mei ‘Eua.

‘I he taimi tatau na’e lava atu ‘aneuhu ‘a e timi mei he Kautaha Mo’ui ‘a Mamaní, Nu’usila pea mo ‘Aositelelia ‘o fakahoko ha ngaahi savea ki he ngaahi kiliniki fakakoló‘i he ngaahi kolό. Hili ‘a e saveá ‘e fakahoko ngaahi timi ko ení ‘e ma’u ai ha ngaahi lipooti fe’unga felāve’i mo e palopalema ki he ma’uanga vaí.

NGATA’ANGA

Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea, mo e Fetu’utaki.

 

Who's Online

We have 263 guests online

CONSULATES/EMBASSIES

PUBLIC ENTERPRISES