Home / PRESS RELEASE / ENGLISH VERSION / Fakamo’oni Aleapau ki he Pa’anga Talasiti Feliuliuaki ‘o e ‘Eá ke fokotu’u ngaahi tangikē vai ma’ae kolo ‘e 15

Fakamo’oni Aleapau ki he Pa’anga Talasiti Feliuliuaki ‘o e ‘Eá ke fokotu’u ngaahi tangikē vai ma’ae kolo ‘e 15

E-mail Print PDF

31 Sanuali 2018 Na’e fakamo’oni ‘i he pongipongi ‘o e ‘ahó ni, ‘a e aleapau ‘i he vaha’a ‘o e Potungāue MEIDECC mo e ngaahi kolo ‘e 15, pea mo e ongo kautaha ‘e ua ‘oku ‘amanaki ke na fakahoko ‘a hono fokotu’u ‘o e ngaahi tangikē vai, ki he ngaahi kolo ko ‘ení ‘i Tongatapú ni.

Ko e ngaahi kolo ‘e 15 ko ení na’á nau ma’u faingamālie ‘i he pa’anga Talāsiti Feliuliuaki ‘o e ‘Eá.

Ko e ongo Kautaha ‘oku ‘amanaki ke na fakahoko ‘a e ngāue, ko e Rotomould Pacific Ltd pea mo e M&J Water Tank Company.

Fakatatau ki he fakamatala ‘a Feleti Fā’otusia ‘a ia ‘okú ne tokangaekina ‘a e Pa’anga Talāsiti ki he Feliuliuaki ‘o e ‘Eá ko e ngaahi kolo ‘e 26 fakakātoa ‘oku ‘amanaki ke fakahoko ki ai ‘a e ngāué. Hili ‘a e fakamo’oni ‘i he aleapau ko ‘ení, ko e ngaahi kolo ai ‘e 15 ‘i Tongatapú ni, ngaahi kolo ‘e tolu ‘i ‘Eua, tolu ‘i Ha’apai pea fā leva ‘a Vava’u.

‘Oku te’eki ai ke fakapapau’i ‘a e taimi ‘e fakahoko ai ‘a e fakamo’oni aleapau mo e ngaahi kolo ‘i he ngaahi ‘otu motú.

Ko e ngaahi kolo ‘e 15 ‘i Tongatapú ‘oku kau atu ki ai ‘a Fanga, Halaleva, Mataika, Ma’ufanga, Ngele’ia, Tofoa, Ha’avakatolo, Houma, Sia’atoutai, ‘Utulau, Ha’asini, Talasiu, Vaini, Veitongo pea mo Longoteme. Ko e kalasi tangikē vai kehekehe ‘e tolu ‘e fokotu’u ‘a ia ‘oku ‘i ai ‘a e ngaahi tangikē vai lita ‘e 12,000, tangikē lita ‘e 5,000 mo e 3,000.

“Ko e lahi taha ‘o e ngaahi koló ko e tangikē vai ki he holo fakakoló pea mo e ‘api siasí. Ko e ngāue ko ‘ení ko e ngaahi tangikē vai ‘ata’ata pē ia. Ko e ngaahi kolo ‘eni ‘e 26 ‘oku natula tatau ‘enau fiema’ú ‘i he tangikē vai, mei he ngaahi kolo ‘e 33 fakakātoa na’a nau ma’u faingamālie ‘i he Pa’anga Talāsiti Feliuliuaki ‘o e ‘Ea.”

“Ko e toenga leva ‘o e ngaahi kolo ‘e fitú, ‘oku natula kehe ‘enau fiema’ú ‘anautolu. ‘A ia ‘oku natula ia ki he tafa’aki ‘o e langá. Temau hoko atu leva ke fai ha sio ki he tafa’aki ko iá ke kamata mo e ngāue ki he ngaahi kolo ko iá ‘i he’ene maaú.”

Na’á ne fakahā foki ko e Rotomould Pacific Ltd tenau fokotu’u ‘a e ngaahi tangikē vai ‘i Tongatapú ni, pea ngāue leva ‘a e M&J Water Tank Company ki hono fokotu’u ‘a e ngaahi tangikē vai ‘i he ngaahi ‘otu motú.

Ko e ngāue ni ‘oku fakafuofua ke kakato pē ia ‘i loto ‘i he māhina ‘e ono. ‘I he lau ‘a Fā’otusia ‘oku fakafuofua ki he $2 kilu ‘oku ‘amanaki ke fakahoko’aki ‘a e ngāué ni.

Ko e aleapau ni na’e fakamo’oni ai ‘a e ‘Ofisa Pule Ngāue ‘a e Potungāue MEIDECC Paula Ma’u pea mo e Talēkita ‘o e Va’a Feliuliuaki ‘o e ‘Eá ‘o fakafofonga’i ‘a e Potungāue MEIDECC. Mei he Rotomould Pacific Ltd na’e fakafofonga’i ia ‘e Prauli Naidu pea mei he M&J Water Tank Company na’e fakafofonga’i ia ‘e Reddy.

NGATA’ANGA

Tukuatu mei he Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea, mo e Fetu’utaki

 

Who's Online

We have 238 guests online

CONSULATES/EMBASSIES

PUBLIC ENTERPRISES