Home / SPEECHES / Speeches by Royal Family

Speeches by Royal Family

Faka'ali'ali Ngoue Vahe fonua 'Eua: To Folofola 'a 'Ene 'Afio Tupou VI

E-mail Print PDF
12 'Okatopa 2012 Ko e To Folofola 'a 'Ene 'Afio Tupou VI ke huufi 'a e Faka'ali'ali Ngoue ' a e Funga Fonua, 'Eua. 'i he 'aho 12 'Okatopa 2012.
Tapu mo e ‘Otua Mafimafi ‘oku ‘afio hotau lotolotonga;
Tapu mo e Palemia mo Hou'eiki;
Tapu mo Ha'a Lotu mo Ha'a Matapule pea;
Tapu mo e Ongo Fakafofonga ‘o e Vāhenga ‘Eua.

‘Oku tau fakafeta'i ki he ‘Otua Mafimafí, ‘i he tapuaki ‘oku tau ‘inasi ai pea ‘oku tokamālie ‘a e me'a hono kotoa ‘i Tonga pea ‘i he Funga Fonuá.  ‘Oku ou fiefia ‘i he ma'u ‘o e faingamālie koeni ke fakataha mo kimoutolu ‘i he Faka'ali'ali Ngoue ‘o e ta'u ni.

‘Oku tuku mai ma'u pe ‘a e ‘amanaki ‘a e ngaahi vahe fonua ‘o Tonga ni´ ki he ngoue ‘a e Funga Fonuá.  Ka ‘alotāmaki ‘a Nātula pea lahi mo e la'ala'aá, ‘e kei fai pe ‘a e fakatu'otu'á ki he ngoue ‘a e Funga Fonuá,  ‘o hangē pe ko hono tala mei mu'a, ko e Feleoko ‘a Mauí, he ‘oku ‘ikai honge ia ha taimi.

Koia,  kāinga ‘o e Funga Fonua, ‘oku ou poupou atu ke hokoatu ‘a e  ngāue kuo fai talu mei mu'a ki he tauhi ‘o e ngaahi fatongia ki he famili, siasi, kolo mo e fonuá pea ke fakapapau'i ‘oku kei malu pé ‘etau ma'u'anga me'atokoni.

Ko e konga mahu'inga ‘o e Faka'ali'ali Ngoué, ko hono faka'ilonga'i ‘e he Potungāue mo e Pule'anga ‘a e ola mo e fua ‘o e ngāue na'a mou fakahoko mei tōkanga, falehanga pea pehē ki he toutaí.  Ko e ‘aho ‘eni ‘e taha ‘oku mou laukau ai ke faka'ali'ali ‘ae ola lelei ‘a ho'o mou ngāue.

‘Oku faka'ilonga'i foki ‘i he mahina ni ‘a e ‘Aho Fakamāmani Lahi ‘o e Me'atokoni, ‘aia ‘oku fakahoko ma'u pe ‘i he ‘aho 16 ‘o ‘Okatopa ‘o e ta'u kotoa ‘i he ngaahi fonua [‘e 191] ‘oku memipa ‘i he Kautaha Fakamāmani Lahi Ki he  Me'atokoni mo e Ngoue, ‘a ia ‘oku ‘iloa ko e F A O.  Ko e kaveinga ki he ta'u ní, ‘oku pehē "Ko e Ngāue Fetokoni'aki ‘a e Ngaahi Kautaha Ngoue, ‘a e Kí ki he lato ‘a e Me'atokoni ‘i Māmaní" (Agricultural Co-operatives - the key to feeding the World").

‘Oku māhino pe ‘a e kāveinga koeni kia kitautolu, he ‘oku ‘i hotau ‘Ulungāanga Fakafonua ‘a e Mo'ui Fētokoni'akí.  ‘Oku toungāue ‘a e kau tangatá pea pehē ki he toulānganga ‘a e kau fefiné.  ‘Oku tatau pē ki he  nofo ‘a kāingá, nofo fakakoló pea a'u pe ki he ngaahi ‘apisia mo e kātoanga fakafiefiá, ‘oku hā pē  ai ‘a e fetokoni'aki mo e fēvahevahe'aki.

‘Oku ou fakamālō atu kia kimoutolu kau Fa'a, ‘a e kau Nimamea'a, kau Toutai kae'uma'a  ‘a e tangata'i fonua mo e fefine'i fonua´ ‘o e Funga Fonuá, ki ho'o mou kātekina ‘a e ongosia´ kae lava ke fakahoko a e Faka'ali'ali  ‘o e fua ‘o e Ngāue ‘i he ‘aho ni.´

Koia,  ‘Oku ou fiefia  ke faka'atā ‘a e Faka'ali'ali Ngoue  ke tau ‘inasi kotoa ai.      ‘Ofa ke mou ma'u ha ‘aho fiefia.

TUPOU VI

NGATA'ANGA

Tukuatu mo fakangofua mei he: 'Ofisi 'o e Palasi, Lord Chamberlain, Nuku'alofa, 'Okatopa 2012

 
Page 9 of 17

Who's Online

We have 321 guests online

PUBLIC ENTERPRISES