Home / SPEECHES / Speeches by Royal Family

Speeches by Royal Family

TO FOLOFOLA: 2013 Niuatoputapu Royal Agricultural Show

E-mail Print PDF
8 'Aokosi, 2013 Ko e To Folofola 'a e Tama Tu'i Tupou VI 'i he huufi 'o e 'uluaki Faka'ali'ali Ngoue 'o e 2012 'i he Vahe Fonua Niuatoputapu 'i he 'Aho 7 "Aokosi, 2013.
KUO AOFAKI 'A E TALA FAKATAPU 'E HE FAKAFOFONGA PULE'ANGA.
'OKU OU TUKU 'A E FAKAMALO KI HE 'OTUA MAFIMAFI 'I HE 'ENE TAUHI MAI KITAUTOLU KI HE 'AHO NI.
'OKU OU FIEFIA FOKI 'I HE FAINGAMALIE KOENI KE MA 'A'AHI MAI MO NANASI KI HE VAHE FONUA NI, HILI 'A E TA'U 'E HONGOFULU MA TOLU MEI HE
FAKA'ALI'ALI NGOUE KO IA NA'E HA'ELEA 'E HE 'ENE 'AFIO KO TAUFA'AHAU TUPOU IV, 'I HE TA'U 2000. NA'E HA'ELE MAI FOKI MO 'ENE 'AFIO KO KINGI SIAOSI
TUPOU V 'I HE TA'U 2008

 

'I HE 'AHO NI, 'OKU OU FIEFIA KE VAKAI ATU KI HE 'OFA MO E MAFANA TATAU PE, KAE'UMA'A 'A E MATEAKI FONUA MO E POLEPOLE 'I HE TUPU''ANGA 'A E
KAINGA 'O E VAHE FONUA NI, 'AIA NA'E TALITALI'AKI 'A E HA'ELE 'O E NGAAHI 'AHO KOEE, 'OKU TO E FOTU'AKI MAI PE 'I HE 'AHO NI. 'OKU 'IKAI FOKI KE
NGALO 'I HE 'ETAU MANATU 'A E FAKATAMAKI FAKAENATULA 'I HE TSUNAMI NA'E HAKE 'I HE TA'U 2009 PEA MOLE AI 'A E NGAAHI 'OFA'ANGA, FAMILI
PEA MO E KAINGA.

KA 'OKU TAU KEI FAKAFETA'I PE KI HE 'OTUA 'I HE NGAAHI TAPUAKI MO E FAINGAMALIE 'O NATULA KE TO E LANGA HAKE AI 'A E NOFO 'A E VAHE FONUA NI.

PEHE FOKI KI HE SEKITOA KI HE NGOUE, TOUTAI MO E VA'A KEHEKEHE KOTOA, KE LATO MO MALU AI 'A E MA'U'ANGA ME'ATOKONI 'OKU FAKATUPU MO'UI LELEI, MA'AE KAINGA 'O E VAHE FONUA NI, 'O FAKATATAU KI HE KAVEINGA 'A E KAUTAHA FAKAMAMANI LAHI KI HE ME'A TOKONI MO E NGOUE (FAO).

'OKU TAU FAKA'AMU KE HOKOHOKO ATU 'A E TAUHI KI HE TAUMU'A 'O E FAKA'ALI'ALI NGOUE - KO E FAKA'ALI'ALI 'O E FUA 'O E FONUA 'OKU LELEI PEA KE FAKAPAPAU'I 'E HE TOUTAI 'OKU MALU MO TO E LELEIANGE 'A E MA'U'ANGA ME'ATOKONI. 'E TANAKI ATU KI AI MO E FIEMA'U KE FAKA'AI'AI 'A E FAKALAKALAKA 'O E NGAAHI NGAUE IIKI 'E TOKONI KI HE ANGA 'O E NOFO MO E MA'U'ANGA MO'UI 'A E FAMILI MO E KAINGA KOTOA.

'OKU 'ILOA 'A E NGAAHI NGAUE TUKUFAKAHOLO 'O E VAHE FONUA NI, 'O TATAU PE 'I HE LAVAME'A 'A E KAU TANGATA NGOUE, KAU TOUTAI PEA PEHE KI HE NIMA MEA'A 'A E KAU FEFINE, 'O HOKO KE MAKEHE AI 'A E NGAAHI KOLOA 'OKU FAKA'ALI'ALI 'E NIUATOPUTAPU NI MEI HE NGAAHI VAHE FONUA KEHE 'O E 'OTU TONGA.

'OKU MAHINO 'A E NGAAHIH KAVEINGA MO E TAUMU'A KOTOA KI HONO FAKAHOKO 'O E NGAAHI NGAUE KI HE FAKALAKALAKA 'O E NGOUE MO E TOUTAI KOE'UHI KO E FEINGA KI HE LELEI FAKALUKUFUA 'A E VAHE FONUA NI KA, TE TAU KEI FEHANGAHANGAI PE MO E NGAAHI POLE 'O NATULA, PEHE KI HE VA-MAMA'O MEI TONGATAPU, SI'ISI'I 'O E IVI FAKAPA'ANGA MO E NGAAHI NAUNAU KE FAKAHOKO'AKI 'A E FATONGIA. KA NEONGO KOTOA IA, 'OKU KEI MONU'IA 'A E KAINGA 'O NIUATOPUTAPU NI, 'OKU MOU 'I HE TOFI'A 'OKU KELEKELE LELEI, 'OSENI 'OKU MAHU, PEA MO E VAHE FONUA 'OKU KEI MALU MO UOUONGATAHA 'A E NOFO 'A HONO KAINGA.

KO E LAVA LELEI 'A HONO FAKAHOKO 'O E FAKA'ALI'ALI NGOUE 'O E 'AHO NII, 'OKU TUPU IA MEI HE NGAUE FAKATAHA 'A E NGAAHI KUPU FEKAU'AKI MEI HE NGAAHI KOLO, NGAAHI POTUNGAUE 'A E PULE'ANGA, KAE'UMA'A FOKI 'AKIMOUTOLU 'A E TANGATA MO E FEFINE'I FONUA 'O E VAHE FONUA NI.

KO IA 'OKU 'OATU AI 'EKU FAKAMALO. 'OKU OU MATU'AKI FIEFIA KE HUUFI 'A E 'ULUAKI FAKA'ALI'ALI NGOUE 'O E TA'U NI, PEA KE 'A'AHI FOKI KI HE NGAAHI LAVAME'A 'A E KAINGA 'O NIUATOPUTAPU NI PEA PEHE KI HE LANGAFONUA 'OKU FAKAHOKO.

'OFA ATU,

 

NGATA'ANGA

Tukuatu mei he: Lord Chamberlain Office, Palace Office, Nuku'alofa, 2013.

Last Updated ( Monday, 26 August 2013 14:22 )
 
Page 4 of 17

Who's Online

We have 168 guests online

PUBLIC ENTERPRISES