Home / SPEECHES / Speeches by Royal Family / Faka'ali'ali Ngoue Ha'apai: Me'a Pilinisi Kalauni Tupouto'a 'Ulukalala

Faka'ali'ali Ngoue Ha'apai: Me'a Pilinisi Kalauni Tupouto'a 'Ulukalala

E-mail Print PDF
8 "okatopa 2012 Ko e me'a 'a e Tama Pilimisi Kalauni Tupouto'a 'Ulukalala 'he Huufi 'o e Fakalakalaka Ngou 'a e 'Otu Motu Ha'apai 'i 'Okatopa 5, 2012.
  • Tapu moe ‘Otua Mafimafi
  • Tapu Lord Tu'iha'angana, koe Kovana Ha'apai,
  • Tapu mo Lord Tu'iha'ateiho mo Hou'eiki
  • Tapu moe Minisita Ngoue, Sangster Saulala
  • Tapu moe Faifekau Pule mo Ha'a Lotu
  • Tapu moe kau Fa'a ‘o Tokanga, kau fefine ‘o Falehanga kae ‘uma'a ‘ae kau Toutai ‘o Ngatai
  • Tapu moe Tangata'i Fonua moe Fefine'i Fonua ‘o Ha'apai
  • Talangata ‘iate AU ‘o fai-ki-tu'a kae ‘ata keu fakamonu hoku Koloa.

Faka-feta'i kihe ‘Otua Mafimafi, ‘ihe Tapuaki kotoa pe kuo ta ‘inasi tatau ai ki he ‘Aho ni. Kuo langimalie e ‘Aho pea Tokamalie e me'a hono kotoa. Ka koe ‘Aho ni ko hoku fakakoloa, ko hoku Polopolo Fatongia kihe Faka'ali'ali Ngoue ‘ae Fonua. Pea Ta-pea-Ngali pe ko Ha'apai Veu, he koe kamata-'anga e me'a kotoa.

‘Aho ni foki koe tuku-'au mai pe ‘oe kato-anga ‘Inasi ‘o Ono-'aho kae'uma'a ‘a e kato-anga Kula. Koe ‘aho ‘oe faka-'ali-'ali e fua ‘o Tokanga, ‘a e Nima-mea'a ‘o Fale-hanga, kae ‘uma'a ‘ae Toutai-ola mei Ngatai.

Ko e mahu'inga ‘o e ‘aho ni - he ‘oku ha sino mai ai - ‘a e ola lelei ‘o e ngaue vaofi mo fepoupouaki ‘a e Pule'anga, Potungaue Ngoue, Me'atokoni, Vao'akau mo e Toutai pea mo e kau Ngoue, kau Nima-mea'a ‘o Fale-hanga, mo e kau Toutai ‘o Ngatai ke fakapapau'i ‘oku malu pea mohu ‘a e tu'unga fakame'atokoni ‘i he Fo'i'one'one.

‘Oku toe mahu'inga foki ‘a e ‘aho ni he ‘oku tau tokoni ai ki hono poupou'i ‘o e ‘aho fakamamani lahi ‘o e Me'atokoni ‘a ia ‘oku fakahoko fakata'u ia ‘i he ‘aho 16 ‘o ‘Okatopa ‘i he malumalu ‘o e Kautaha Fakamamani lahi ‘o e Me'atokoni mo e Ngoue (FAO) mo hono taumu'a ngaue ki he ta'u ni - "Ko e Ngaahi Kautaha Ngoue Fetokoni'aki ‘a e Kï ke Makonga ai ‘a Mamani" He ko ‘ene makona pe ‘a e Tonga - faingofua ‘eta uta atu hota tapuaki mei he koloa ngoue mo e toutai ki tu'apule'anga.

‘Io - Ha'apai Veu, ko e ‘aho eni ‘o e faka-'ali-'ali e Tapuaki ‘oe Fa'ahi-ta'u kuo hifo-aki mai mei ‘Olunga ko hota ‘inasi tupu'a talu-mei-mu'a.

Ka ‘e tuku koa e Vaka kae fai ha Kakau, ko hotau Tala e, keta Ngaue'i e Fonua, Ngaue'i e ‘Ulu-fonua, ‘a e ‘Utu-la'a-ina kae'uma'a ‘ae ‘Utu-ma-uku. Pea ko hota tapuaki ia, he neongo ‘e ta To-kakava mo ‘e ta Taukei, ka ko hono Faka-ola ‘e ta Ngaue ‘oku hifoaki kotoa pe mei ‘Olunga. Mo'oni e lau ‘ae Folofola, kuo fai hotau Tokonaki mei Langi, ka ko kitaua pe hono utu mo hono ‘a'au.

Ko ia e faka-feta'i moe faka-malo ‘o e ‘Aho, kia kimoutolu kau Fa'a, ‘a e kau Nimamea'a, ‘a e kau Toutai kae'uma'a e kau Ngaue kotoa ‘o Ha'apai, ki ho'omou katekina e ongosia, ‘a e mamatea kae 'uma'a ‘ae mokosia, ho'omou fuesia kae ‘inasi ai e Fonua he faka-'ali'ali Ola mo Fisifisimu'a ‘o e ‘aho ni.

Pea ko ‘etau faka-'amu mo ‘etau ‘a-naua kotoa ia, ke ‘inasi pea ‘au e fekau ki he Hako-tupu ‘oe Fonua, ko e ama-taki-loa e ‘o e Tuku-faka-holo ke lele'i telia e kaha'u ‘o e fonua. Kae tuku e faka-falala ki muli, he kuo afu-hia ai hotau kuonga hono ngaahi nunu'a. Ka tau tokanga ki hotau tupu-'anga, koe hala-kuo-papa, he fononga lau-afe'i-ta'u mai ai hotau kau holomu'a.

Tau ange kihe Ta'ehamai, ke Ta'e-ma-motu mo Toupili ma'u pe ‘ene ‘Alo'ofa mo hono Ivi Fakamo'ui, ke faka-pulu-pulu-'aki ho'omou ongo-sia, he kuo ‘inasi kotoa ai e lahi-moe-si'i, ‘io, ‘ae manu-vaivai ‘oe fonua.

Ko ia kuo u Langilangi'ia Mo'oni ke "Faka-‘ata e FAKA'ALI'ALI NGOUE ‘o Ha'apai Veu ke tau ‘Inasi Kotoa ai".

Tu'a-‘Ofa Atu

NGATA'ANGA

Tukuatu mei he: Potungaue Fakamatala moe Fetu'utaki, Nuku'alofa, 2012

 

Who's Online

We have 401 guests online

PUBLIC ENTERPRISES