Home / SPEECHES / Speeches by Royal Family / Too Folofola 'a 'Ene 'Afio: Katoanga Hilifaki Kalauni

Too Folofola 'a 'Ene 'Afio: Katoanga Hilifaki Kalauni

E-mail Print PDF

‘Oku ou fie fakatapu atu ki he Ha'a kotoa pe ‘oku fa'a fakatapua.

‘I he senituli 19, ne fehangahangai ai ‘a e Tu'i ‘Uluaki pea moe ngaahi faingata'a lahi ‘i he ‘e ne feinga ke fakahake ‘a e lotu ‘i Tonga ni pea fakaloto'i ‘a e Hou'eiki ‘o e ‘aho ko ia ke nau poupou ki ai.

‘I he kuonga koe ‘o e Tu'i Ua, koe kuonga ia ne malohi taha ai ‘a  e ivi ko e ‘o e ngaahi fonua lalahi pea mo ho nau loto ke nau pule'i ‘a e ngaahi fonua iiki.  Ne fe'ao foki ‘a e Tu'i mo e fatongia mamafa mo faingata'a ko ia ko hono malu'i ‘a e tau'ataina ‘o ho tau fonua telia na'a pule'i tautolu ‘e ha fonua kehe, neongo ‘a e mole ‘a e ngaahi Pule'anga ko ia ho tau kaunga ‘api.

Ne hoko mai ‘i ai, ‘i he 1917 ‘a e kuonga ‘o Kuini Salote. Neongo ne mahu'i atu ‘a e ngaahi fakatu'utamaki ne fehangahangai pea moe Tu'i Ua, ne fetongi ‘aki ia ‘a  e fakatu'utamaki lahi ange. Ne kamata ‘a e Tau lahi ‘o e 1914-1918, hoko ai ‘ a e mahaki faka'auha ‘o e 1919, muimui ai leva ‘a e fakamasiva lahi ko ia ‘o e 1929 ‘a ia ne holo lahi ai ‘a  e maketi pa'anga ‘a mamani.  Tuaiekemo ‘a ‘ene ngalingali foki ki hono tu'unga totonu mo e kamata ‘a e Tau Lahi hono Ua.

‘I he ta'u ‘e 50 fakamuimui ‘o e senituli 20, ‘o kau ai ‘a e kuonga ‘o Tupou IV, ne tau mamata ai ‘i he ta'u fakatu'utamaki ‘aupito ‘a mamani ‘i he vaha'a ‘o e melino pea moe tau ko e ‘uhi ko e fehangahangai ‘a e ongo fonua malohi taha ‘i mamani, ko ‘Amelika pea mo Lusia.

‘Oku mahino mai leva ‘oku ‘ikai te tau lava ‘o tu'u makehe mei ngaahi fakatu'utamaki ‘oku hoko ki mamani, pea te tau lave kotoa foki ‘i he ngaahi fakalaka fo'ou.

Kuo fakamo'oni mai ‘e he ngaahi fakamatala ‘a e Kautaha ‘a e ngaahi Pule'anga Fakatahataha pea mo e Pangike ‘a Mamani ‘oku fakafiemalie ‘aupito ‘a e tu'unga faka'ikonomika ‘o ho tau fonua pea moe ‘amanaki ki he kaha'u.

‘Oku ou loto leva ‘i he tau te u Katoanga Hilifaki Kalauni ‘oku hanga mai ‘i he uike ni, ke tau manatu'i ‘a ho tau si'i kainga mo e kaunga'api ko ia ‘oku nau tukuhausia pe faingata'a'ia makatu'unga mei he mahamahaki, ‘alonga pe masiva. Ko e katoanga ni ‘oku ‘ikai ngata pe ‘i he ‘aho ke nekeneka ai ‘a Hou'eiki, ke tau fe'iloaki ai pea mo hotau kainga mo kaungame'a ‘oku nau taka ‘i muli, ka ko e taimi foki ke tauala atu ‘o fakaafe'i mai ‘a hotau kaunga'api pea tau fakaha ai ‘a ‘e tau ‘ofa kia kinatuolu.

‘Oku ‘iloa ‘a ho tau fonua ko e ‘Otumotu Anga'ofa pea ko e taimi eni ke fakaha ai ho tau ‘ulungaanga koia ‘oku tau ‘iloa ai.

‘Oku ou ‘ofa lahi atu ‘aupito kiakimoutolu hono kotoa.

END

 

Who's Online

We have 403 guests online

PUBLIC ENTERPRISES