Fiefia e ‘Eiki Palemia he ‘Amanaki ke ne Talitali e Palemia ‘o Nuu Sila, Hon. Jacinda Ardern

E-mail Print PDF

 

06 Ma’asi, 2018 ENGLISH Na’e me’a e ‘Eiki Palemia, Samuela ‘Akilisi Pohiva he ‘aho ni ‘o pehe oku ne fiefia ‘i he ‘amanaki ke ne talitali ‘a e ‘Eiki Palemia ‘o Nuu Sila, Hon. Jacinda Ardern, he houa efiafi ‘o e ‘aho Tusite ko hono 6 ‘o Ma’asi.

Na’e me’a e ‘Eiki Palemia ‘o pehe, “’Oku ou matu’aki fiefia ‘aupito ‘i he ‘amanaki ke u talitali ‘a e Palemia ‘o Nu’u Sila, Hon Jacinda Ardern ‘i he ‘ene fuofua folau mai ki hotau fonua. Pea ‘oku ou toe fiefia foki he ‘oku kau ‘i he kau folau e ‘Eiki Tokoni Palemia ka ko e ‘Eiki Minisita ki Muli ‘a Hon. Winston Peters kae’uma’a e Hou’eiki Minisita kehe. Pea ‘oku hounga’ia ‘i he ‘eku lave’i na’e vilitaki ‘a ‘Eiki Palemia Jacinda Ardern ke fai mai ‘ene folau neongo e ha’aha’a ‘o e Saikolone ko Gita, he ‘oku ha sino mai ai ‘a ‘ene tokanga makehe ki he tu’unga mo’ui lelei ‘o e kakai ‘o e motu ‘oku ofi taha ki hono fonua, ‘a ia ko Tonga ni”.

‘E tu’uta ‘a ‘Eiki Palemia Jacinda Adern mo ‘ene kau folau he mala’evakapuna Fua’amotu he 6:45pm he efiafi Tu’usite pea ‘e me’a atu ‘a e ‘Eiki Palemia, Samuela ‘Akilisi Pohiva, ke talitali ia ‘i ha’ane me’a hifo mei he vakapuna. ‘Oku fe’unga mo e toko 60 katoa e kau folau ‘o kau ki ai e Hou’eiki Minisita kehe, ongo fakafofonga ‘o e ongo paati fakapolitikale ko e Greens pea mo e National Party, pea mo e kau fakafofonga mei he ngaahi pisinisi lalahi ‘a Nuu Sila pea pehe ki he ngaahi kautaha ‘oku ikai ko ha kupu ‘oe Pule’anga. ‘Oku tanaki mai ki ai e kau faiongoongo tokolahi.

‘I he pongipongi Pulelelulu ko hono 7 ‘o Ma’asi ‘e talitali lelei ai ‘e he ‘Eiki Palemia Nu’u Sila ha ni’ihi ‘o e hou’eiki fafine tu’ukimu’a hotau fonua ‘i ha polokalama ‘ilo pongipongi ‘oku ui ko e “Women’s Leadership Breakfast” ke faka’ilonga’i’aki e ‘Aho Fakamamani Lahi ‘o e Hou’eiki Fafine ‘i he Hotele Tano’a. Hili ko ia ‘e fakahoko leva ha fakataha fakavaha’apule’anga ‘a e ongo ‘Eiki Palemia ‘i he loki Kapineti ‘i he King George Palace. Hili e fakataha ‘e me’a atu leva e ‘Eiki Palemia Nu’u Sila ki he ‘Apiako Lautohi Pule’anga ‘o Fasi-moe- Afi ‘a Tungi pea mo e kolo ko Pili ke vakai tonu ki he maumau lahi na’e feia ‘e Gita pea mo e tokoni fakavavevave ne fakahoko ‘e he Pule’anga ‘i he tokoni mai e Pule’anga Nu’u Sila.

‘E hoko atu leva e polokalalam ki ha talitali ‘ilo hoa’ata ‘a e Pule’anga Tonga ‘i he Hotele Tano’a pea ka hili ia ‘e me’a atu e kau folau ki ha polokalama makehe he Senita Fakafonua ‘o Tonga ‘i Tofoa. ‘Oku fokotu’utu’u e polokalama ko ia ‘e he ‘Ofisi ‘o e Pule’anga Fakatahataha ‘a Mamani ‘i Tonga ni pea mo e Pule’anga Tonga pea oku fakataumu’a ki hono faka’ai’ai e to’utupu ‘o e fonua ke nau kau ki hono talanga’i e langa fakalakalaka ‘o e fonua. Ko e ‘Eiki Minisita Mo’ui mo e Minista ki he Ngaahi Pisinisi ‘a e Pule’anga, Hon. Dr. Saia Piukala te ne talitali e kau folau ki he polokalama ko ia. Ka hili ia ‘e toki me’a atu e ‘Eiki Palemia Nu’u Sila mo ‘ene kau folau ki mala’e vakapuna ‘o me’a atu ki he ‘Otu Motu Kuki.

Na’e me’a e ‘Eiki Palemia ‘o pehe, “‘Oku ou palani ke puke e fangamalie ko ‘eni ke fai ai ha fakamalo hangatonu ki he ‘Eiki Palemia Nu’u Sila koe’uhi ko e fuu tokoni fakavavevave mo fiema’uvivili na’a nau fakahoko mai ki Tonga ni. ‘Ikai ke ngata ai na’e tokoni lahi ‘aupito foki e tu’unga matu’a mo e tu’unga finematu’a mei he va’a tau malu’i fonua, ‘uhila, potungaue mo’ui, pea mo e va’a fakatamaki fakenatula ‘a Nu’u Sila ‘i he hili pe ko ia ‘a Gita”.

“’I he taimi tatau ‘oku ou mafana makehe he ongona mai he ongoongo ‘oku fakakaukau e Tokoni Palemia, Hon Winston Peters, ke hiki hake ‘a e patiseti ‘a e Potungaue ki Muli mo e Fefakatau’aki ‘a Nu’u Sila pea ke toe tanaki mai mo ha pa’anga fo’ou ki he polokalama tokoni ki he ngaahi ‘Otu Motu ‘o e Pasifiki ‘o kau foki ai ‘a Tonga”, ko e aofangatuku ia ‘a e ‘Eiki Palemia, Samuela ‘Akilisi Pohiva.

NGATA’ANGA

Tuku atu mei he: ‘Ofisi Palemia P.O. Box 62, Nuku’alofa, Tonga. Tel: (676) 24 644 Fax: (676) 23 888; For media enquiries- Email: This e-mail address is being protected from spambots. You need JavaScript enabled to view it Website: www.pmo.gov.to

Last Updated ( Tuesday, 06 March 2018 11:48 )  

Who's Online

We have 90 guests online

PUBLIC ENTERPRISES