Fanongonongo Fakapule'anga

E-mail Print PDF

27 Fepueli 2017 Tapu ki He’ene ‘Afió Kingi Tupou VI, pea mo e Fale ‘o Ha’a Moheofo.

Pea ‘oku ou kole keu hufanga ‘i he ngaahi talafakatapu kakato ‘o e fonuá,  kae ‘atā keu fakahoko atu ‘a e fanongonongo ni, fekau’aki mo e tu’utu’uni ‘a e Kapineti ‘a ‘Ene ‘Afió, ki he Faka’apa’apa Fakapule’anga ki he pulonga kuo tō ‘i he ‘Otu Felenité, ‘i he Hala ‘a  ‘Ene ‘Afió, Kuini Halaevalu Mata’aho, ko e Kuini Fehuhu ‘Ofeina ‘o e ‘Otu Tongá.

Toumoloto ‘a e Fuka Tonga

Ke fakahā ‘a e faka’apa’apa ki he hala ‘a ‘Ene ‘Afió, Kuini Halaevalu Mata’aho ko e Kuini Fehuhu ‘Ofeina ‘o e ‘Otu Tongá, ‘oku ou faka’apa’apa kae fakahoko atu heni ke mea’i ‘e Hou’eiki mo e kakai ‘o e fonuá, kuo tu’utu’uni ‘a e Kapineti ‘a ‘Ene ‘Afió, ‘e toumoloto ‘a e fuka kotoa ‘i he ‘Otu Tonga ni ‘o kamata mei he ‘aho Tusite 28 ‘o Fepueli 2017.  Ko e ‘aho eni ‘e tu’uta mai ai ‘a ‘Ene ‘Afió, Kuini Halaevalu Mata’aho ko e Kuini Fehuhu ‘Ofeina ‘o e ‘Otu Tongá kuo halá, ki Tonga ni.  ‘E hokohoko atu pē ‘a e toumoloto ‘a e fuka Tongá he vaha’a taimi ‘o e Tapu pō hongofulu ‘a e Fale ‘o Ha’a Moheofó.

‘Aho Malolo Fakapule’anga Makehe

‘I he faka’apa’apa ki he ouau Telio ‘o ‘Ene ‘Afió, Kuini Halaevalu Mata’aho ko e Kuini Fehuhu ‘Ofeina ‘o Tonga kuo halá, ‘oku ou faka’apa’apa kae fakahoko atu heni ke mea’i ‘e Hou’eiki kaeuma’a ‘a e kakai ‘o e fonuá, kuo tu’utu’uni ‘e he Kapineti ‘a ‘Ene ‘Afió ke hoko ‘a e ‘aho Pulelulu 1 ‘o Ma’asi 2017, ko e ‘Aho Malōlō Faka-Pule’anga Makehe ki he kotoa ‘o e ‘Otu Tonga ni.

 

‘I he loto faka’apa’apa mo’oni,

Dr Palenitina Langa’oi

Sekelitali Pule mo e Sekelitali ki he Kapineti

 

-NGATA’ANGA-

Tuku atu mei he:‘Ofisi ‘o e Palēmia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644     Fax: (676) 23 888; Ngaahin Faka’eke’eke- Email: This e-mail address is being protected from spambots. You need JavaScript enabled to view it Uepisaiti: www.pmo,gov.to

 

Who's Online

We have 248 guests online

PUBLIC ENTERPRISES