Press Releases Tongan version

The Tongan version of the English Press Release versions.(Ko e liliu faka-Tonga e ngaahi ongoongo faka-Pilitania)

Laumalie lelei ‘a e ‘Eiki Palemia ki he Ola ‘o e Fakataha Fakata’u hono 49 ‘a e Kau Taki ‘o e Pasifiki

E-mail Print PDF

18 ‘o Sepitema, 2018 ENGLISH Na’e fakaha ‘e he ‘Eiki Palemia, Hon Samuela ‘Akilisi Pohiva, ‘a ‘ene laumalie lelei ki he ola ‘o e Fakataha Fakata’u hono 49 ‘a e Kau Taki ‘o e Tukui Fonua ‘o e Pasifiki (PIF) na’e fakahoko ki Naulu ‘aho 3 ki he 6 ‘o Sepitema, 2018.

Na’a ne me’a ‘o pehe, “‘Oku ou fiefia he ola ‘o engaahi alelea na’e fakahokó lolotonga ‘a e Fakataha ‘a e Kau Taki ‘a ia na’e fakafou mai he ‘Lipooti ‘o e Fakataha’ (Forum Communique’). Ko e ngaahi aleá na’e fai na’e ma’uloloa, faka’auliliki pea ki’i faingata’a he taimi ‘e ni’ihi. Ka ‘i he’ene a’u ki he faka’osi ‘o e fakataha na’e fai e felotoi mo e femahino’aki ‘a e Kau Taki”.

Na’a ne toe me’a ‘o pehe, ko e ngaahi alea fekau’aki pea mo e “Fakafepaki’i ‘o e Feliliuaki ‘o e ‘Ea” na’e faingata’a taha ki he kau Taki he na’e fiema’u ‘e ha ni’ihi ke ngaue’aki ha ngaahi lea fefeka ka ‘i he taimi tatau na’e ‘i ai e ni’ihi ne nau fakafepaki’i pea ne iku pe ki ha felotoi ‘a e ongo fa’ahi. Ka na’a ne pehe, “Neongo e ngahi fefaikehekehe’aki na’e iku lototaha ‘a e kau Taki ‘o e Tukuifonua Memipa ki he ui mo e kole ki he Pule’anga ‘Amelika ke nau foki ‘o kau ki he “Aleapau Fekau’aki mo e Feliliuaki ‘o e ‘Ea” pe Paris Agreement on Climate Change”.

Na’e toe me’a e ‘Eiki Palemia ‘o pehe na’e kau ‘a hono fakapaasi ‘e he Kau Taki ‘a e “Talafakahahaa ‘o Boe” (Boe Declaration) he ngaahi makamaile ‘o e Fakataha hono 49. Na’a ne me’a ‘o pehe, “Na’e toe fakapapau’i ai ‘e he Kau Taki ‘a e totonu mo e tau’ataina ‘o e pule’anga ‘o e ngaahi fonua memipa kotoa pe ‘o e Kautaha Fakafonua ‘o e Pasifiki, ke ne faitu’utu’uni ki he ngaahi me’a ‘oku nau loto ke hoko honau fonua ‘o tau’ataina mei ha kaunoa mei tu’a. Pea ‘ikai ia ko ia, pe na’a nau toe fakapapau’i ‘oku tau’ataina ‘a e ngaahi Pule’anga ‘o e tukuifonua ko ia ke faitu’utu’uni fakafo’ituitui pe fakatokolahi ‘o fekau’aki mo e malu mo e ma’uma’uluta honau ngaahi fonua”. Na’e toe felotoi foki e Kau Taki ki hano fakalahi atu ‘a hono faka’uhinga’i ‘o e Malu (Security), ke fakakau atu ki ai ‘a e Malu ‘a e kakai ‘o e fonua ‘i he’enau fakafeangai faka’aho, Malu ‘a e ‘Atakai mo e ngaahi Koloa Fakaenatula, Ngaahi Hia Fakavaha’apule’anga pea mo e Ngaahi Hia ‘oku fakafou mai he tekinolosia faka ‘initaneti.

Lolotonga ‘a e fakataha mo e Kau Takii, na’e fakahoko ‘e he ‘Eiki Palemia ha’ane me’a ki ha kaveinga ‘e ua. Ko e ‘uluaki na’a ne me’a ‘o fakafofonga’i ‘a e Fakataha ‘a e kau Minisita Sipoti ‘a e Pasifiki ‘a ia kuo nau fokotu’u mai ki he Kau Taki ‘o e Pasifiki ke nau poupou’i mu’a: ‘a hono fokotu’u ‘o ha ‘Ofisi Faka-Sekelitali ‘a e Kau Minisita Sipoti ‘a e Pasifiki ‘i Tonga ni; ke fai hano toe huke ‘o e Siate ‘o e Sipoti ‘a e Pasifiki (Pacific Games Charter) pea mo e Aleapau mo e tukuifonua ‘oku fakahoko ki ai ‘a e Sipoti ‘a e Pasifiki pea mo e Komiti Sipoti ‘a e Pasifiki; pea ke fokotu’utu’u ha founga ngaue mo ha fa’unga fakapa’anga (funding model) fo’ou ‘o e Sipoti ‘a e Pasifiki. Na’e felotoi ‘a e Kau Taki ke nau “fakatokanga’i” ‘a e ngaahi tu’utu’uni koeni ‘a e kau Minisita Sipoti ‘’a e Pasifiki’ ‘I he Lipooti ‘o e Fakataha (Forum Communique).

Ko hono ua, na’a ne toe me’a ‘o fakahoko ‘a e kole ‘a e Pule’anga Tonga ke fakahoko mai ki Tonga ni ‘a e Fakataha ‘a e Kau Taki ‘o e Tukuifonua ‘o e Pasifiki ‘i he ta’u 2021. Na’e ‘osi fakahoko foki ‘a e Fakataha ni ki Tonga ni ‘i he ngaahi ta’u kehekehe ‘e tolu: ko e 1975, 1988 pea mo e 2007. Ko Aositelelia mo Fisi e ongo fonua ‘e ua kehe na’e fakahu fakataha atu mo Tonga ‘i he kole ke fakahoko ki ai ‘a e fakataha ‘i he 2021. Na’e ‘ohake ‘i he fakataha (bilateral meeting) ‘a Tonga mo ‘Aositelelia ‘e he ‘Eiki Palemia kia Hon. Marise Payne, ko e Minista ki Muli ‘a ‘Aositelelia, kimu’a pea fakahoko ‘a e Fakataha ‘a e Kau Taki, pea ne fakahā mai ‘e malava ke fai ha holomui ‘a ‘Aositelelia mei he’ene fokotu’u ka ‘oku ‘i he Kau Taki pe ‘a e fili koia. Na’e fakamahino mei ‘Aositelelia ‘a ‘enau holomui mei he’enau ‘uluaki fokotu’u lolotonga ‘a e fakataha ‘a e Kau Taki. Ka ‘i he aofangatuku ‘o e fakataha na’e ‘ikai ke faitu’utu’uni e Kau Taki pe ko fe fonua ‘e fakahoko ki ai ‘i he 2021. Ka na’a nau fakamahino ‘i Naulu ‘e fakahoko ki Tuvalu he 2019 pea ki Vanuatu ‘I he 2020.

Lolotonga ‘a e ngaahi fakataha kehekehe na’e fakahoko he Fakataha hono 49 ‘a e Kau Taki ‘o e Tukuifonua ‘o e Pasifiki pea mo ‘ene ngaahi fakataha fakataautaha mo e tukuifonua kehe (bilateral meetings) ne ma’u faingamalie ai ‘a e ‘Eiki Palemia pea mo e kau muimui folau ke kole ha poupou fekau’aki mo pole ‘a e Pule’anga Tonga ke fokotu’u ‘a e ‘Ofisi Fakahoko Ngaue ‘a e Aleapau Fefekakatau’aki ‘a e Pasifiki (PACER Plus Implementation Unit) ‘i Nuku’alofa. Ko e tu’utu’uni aofangatuku ki ai ‘oku ‘i he aofinima ‘o e tukuifonua ‘o e Pasifiki ‘oku nau memipa ‘i he aleapau PACER Plus.

Na’e kau atu ‘a e ‘Eiki Palemia fakataha mo e ongo ‘Eiki Minisita, Hon. Dr. Pohiva Tui’onetoa Minisita Pa’anga mo e PAlani Fakafonua mo Hon. Dr. Tu’i Uata, ‘Eiki Minisita Fefakatau’aki, Konisiuma, ‘Ilo fo’ou mo Ngaahi Ngaue ki he Kakai, ki ha ngaahi fakataha (bilateral meetings) pea mo e ‘Iunioni ‘a ‘Iulope, Noauei, Siamane pea mo e Fakafofonga Makehe ‘o e Sekelitali Seniale ‘a e  Pule’anga Fakatahataha.

‘I he fakataha mo e ‘Iunioni ‘a ‘Iulope na’e fakamo’oni tohi ai e ongo fa’ahi ki he aleapau fetokoni’aki ‘oku fe’unga hono mahu’ainga mo e pa’anga ‘iulope (Euros) ‘e 11.9 miliona ko e tokoni mai ‘a ‘Iulope ki he polokalama Ma’u’anga Ivi fakafonua, Founga Pule’i ‘o e Koloa mo e Pa’anga ‘ae fonua, pea mo e Ho’ata ki Tu’a mo e Pule Lelei, ‘a e Pule’anga Tonga.

‘I he fakataha mo e Pule’anga Noauei na’e fakapapau’I mai ai ‘e Noauei ‘enau tokoni ‘oku fe’unga mo e pa’anga ‘Amelika ‘e $2 miliona ki Tonga ni ke langa’i hake ‘e Senita FakaPasifiki ki he Ma’u’anga Ivi Fakaenatula (Pacific Centre for Renewable Energy) ‘a ia na’e ‘osi fokotu’u ‘e he ‘Ofisi Fakasekelitali ‘a e Komuniti FakaPasifiki (Secretariat of the Pacific Community).

‘I he fakataha mo e Pule’anga Siamane na’e fakapapau’i mai ‘i ai ‘enau tokoni fakapa’anga mo e fakatekinikale ki he Polokalama Ngaue ‘a Tonga fekau’aki mo e Feliliu’aki ‘o e ‘ea mo e tokoni tatau ki he ‘apiako Fokololo (Tonga Maritime Poly-Technical Institute).

‘I he fakataha mo e Pule’anga ‘Aositelelia na’e fakapapau’I mai ‘e ‘Aositelelia ‘oku kei tu’uma’u ‘enau ngaahi tukupa fetokoni’aki mo Tonga ni neongo na’e fai e liliu ki he kau Taki fakapolitikale ‘o e fonua. Na’e kau ‘I he tukupa ko eni ‘a e femahino’aki ‘oku kau ‘a Tonga ‘I he ngaahi fonua ‘e fakakau atu ki he polokalama ngaue fakataimi fo’ou ‘oku ui ko e Pacific Labour Scheme, ‘a ia ‘e fakangaue’I ai e kakai mei Tonga ni ‘oku na’u ma’u ha taukei-ngaue ‘I he ngaahi mala’e kehekehe. (‘Oku kehe foki ‘a e polokalama fo’ou ko eni mei he Seasonal Workers Program ‘a ia ‘oku lolotonga ma’u ngaue ai e kakai Tonga tokolahi he tolifo’I’akau he ngaahi faama.)

‘I he fakataha mo e Fakafofonga Makehe ‘a e Sekelitali Seniale ‘o e Pule’anga Fakatahataha, na’e fakapapau’I mai ai ‘e Fekitamoeloa Katoa ‘Utoikamanu ki he ‘Eiki Palemia ‘oku kei tu’uma’u pea ‘e fakalahi mai ‘a e ngaahi polokalama tokoni ‘a e ngaahi va’a ‘o e Pule’anga Fakatahatah ki he Pule’anga Tonga. Na’ e fakamalo’ia foki ‘e he ‘Eiki Palemia e ngaahi lelei kotoa pe ‘oku fakahoko ‘e Fekitamoeloa mei he Pule’anga Fakatahataha pea ko e taha ia e ngaahi me’a o’oku polepole ai e Pule’anga Tonga. .

Ne toe me’a atu foki ‘a e ‘Eiki Palemia pea mo e kau muimui folau ki ha fakaafe mei he komiuniti Tonga ‘I Naulu ki ha houa ‘ilo efiafi ‘i he ‘aho 4 ‘o Sepitema. Ko e komuiniti Tonga ‘i Naulu ‘oku taki ai ‘a Dr. Sililo Tomiki, ko e Toketa Pule tutuku mei he Va’a Nifo ‘o e Falemahaki Vaiola, tokoni ki ai ‘a Vili Malupo mei he Falema Rainbow ‘i Nuku’alofa pea mo Semisi Ma’u, ko e ako tutuku ‘o e Kolisi ko Tupou ‘a ia ne ‘ave ‘e Faifekau Feke Kamitonu ki Naulu ke ne faiako’i ‘a e ngaahi ifi palasa mo e hiva ‘a e ngaahi siasi ‘i Naulu. Na’e mafana mo fakafiefia ‘aupito ‘a e feohi mo e ma’ume’atokoni na’e fai pea na’e fakahoko ‘e he ‘Eiki Minisita Pa’anga ha lea fakamalo kia Toketa Sililo Tomiki mo e kainga ‘o fakafofonga’i e ‘Eiki Palemia mo e kau muimui folau.

NGATA’ANGA

Issued by the: The Prime Minister’s Office, P.O. Box 62, Nuku’alofa, Tonga. Tel: (676) 24 644 Fax: (676) 23 888; For media enquiries- Email: This e-mail address is being protected from spambots. You need JavaScript enabled to view it Website: www.pmo.gov.to

Last Updated ( Tuesday, 18 September 2018 10:53 )
 
 

Fakatokanga tokateu ki ha El Niño pea si’i ange ‘ae ‘uha ‘ihe ‘avalisi ‘i Tonga

E-mail Print PDF

10 Sepitema 2018

To’o konga lalahi

Na’e kei ‘ihe ‘avalisi angamaheni ‘ae tahi ‘oseni Pasifiki lolotonga ‘a ‘Aokosi, Koe ngaahi faka’ilonga ‘ihe ‘atimosifia moe ‘oseni ‘oku kamata pe ke ma’u ‘ae ngaahi faka’ilonga ‘oe fa’ahi ta’u El Niño.  ‘Oku fenapasi ‘eni moe ngaahi fakafuofua mei he ngaahi me’afua fakamamani lahi ‘aia ‘e fai e maliu kihe fa’ahi ta’u El Niño ‘i he mahina ‘e tolu ka hoko.  Koe fakafuofua ‘oku ‘i he 62% ‘ae faingamalie ke hoko ‘i Sepitema ki Novema 2018. ‘Oku ‘i he 78% ‘ae faingamalie ka hoko ‘ae El Niño pea a’u ki hono malohi ‘i he vaha’a taimi Ma’asi ki Me 2019.

Ko e ha ‘a e El Niño?

Ko e El Niño ko e fa’ahi ta’u ‘oku nga’unu ai ‘a e konga tahi mafana ‘oku anga maheni ke toka ma’u pe ki he tokelau ‘o Aositelelia ‘o kolosi he Pasifiki ‘o a’u ki ‘Amelika Tonga.  Ko e nga’unu ‘a e konga tahi ‘oku ne hiki’i hake ai e mafana e tahi ‘i he Pasiki ‘o lahi hake ‘i he mafana angamaheni pea hoko ai e ngaahi liliu kihe natula angamaheni e ‘ea ‘i he ngaahi feitu’u lahi kau ai ‘a Tonga ni.  Ko e El Niño ‘oku hoko fakanatula pe pea meimei ke hoko ‘i he ta’u 3 ki he 7 kotoa pe.

Ko e uesia ‘e he El Niño e ‘ea ‘o Tonga ni

Ko e fa’ahi ta’u El Niño ‘oku fa’a a’u pe hono loloa ia ki he ta’u ‘e taha neongo ‘oku lava pe ke nounou ange ai pe toe loloa ange ai.  Ko e ngaahi uesia ki Tonga ‘oku kau ai e mokomoko ange ‘a e taimi po’uli, si’isi’i ange ‘a e ‘uha ‘i he fa’ahi ta’u ‘uha pea lahi ange mo e faingamalie ke uesia ‘a Tonga ha saikolone fakatalopiki ‘i he fa’ahi ta’u Afaa.  ‘Oku ‘avalisi ki he saikolone ‘e 1 te ne uesia ‘a Tonga ‘i he ta’u ka ‘oku ‘unu hange ‘a e fika ko’eni ‘o ofi ‘i he 2 ‘i he fa’ahi ta’u El Niño.

La’ala’aa (pakuka pe si’i ‘ae ‘uha ‘i he ‘avalisi pe angamaheni).

‘Oku lahi ‘ae ngaahi faka’uhinga ‘oe fo’i lea ko’eni koe drought pe koe la’ala’aa pe koe pakukaa he ngaahi faka’uhinga ‘e ni’ihi.  Ka koe ‘uhinga ‘oku ngaue’aki heni ki he fo’i taimi ‘oku fu’u si’isi’i ai ‘ae hauhau e kelekele pea moe ngaahi ma’u’anga vai ‘i he anga maheni ‘aia ‘oku anga kiai ‘ae kakai ‘i he sosaieti.  Koe fakalea ‘e taha koe tu’unga ‘oku fu’u ma’ulalo ai ‘ae ‘uha ‘o tupu ai ‘ae si’i ‘ae ma’u’anga vai ke fakalato ‘ae ngaahi fiema’u ‘ae tangata.

Ko e tu’unga lolotonga ‘oe la’ala’a.

Ko Niuafo’ou mo Vava’u ‘oku na lolotonga fe’ao mai moe si’i ange ‘ae ‘uha ‘i he ‘avalisi angamaheni fakatatau ki he lahi ‘oe ‘uha kuo tanaki. Na’e ofi ‘aupito ‘i he ‘avalisi ‘ae ‘uha na’e tanaki ‘i ‘Aokosi ‘i Niuafo’ou ka na’e ma’ulalo ‘i he ‘avalisi ‘ae ‘uha ‘i he ngaahi mahina ki mu’a talu mei Sune.  Na’e ma’ulalo ‘aupito ‘ae ‘uha ‘i he ‘avalisi i Vava’u lolotonga ‘a ‘Aokosi.  Ko Niuatoputapu ‘oku ‘asi mai pe ‘oku si’i ‘ae ‘uha ‘i he ‘avalisi talu mei Sune 2018 pea ‘oku tatau pe ki Ha’apai mo Tongatapu koe’uhi he na’e ma’ulalo ‘ae ‘uha ‘i he ‘avalisi ‘i he mahina kuo ‘osi.

Ko e ngaahi El Niño he kuo hili

Koe la’ala’a malohi mo fakatupu honge vai taha kuo lekooti ‘i Tonga ni na’e hoko ia ‘ihe faha’i ta’u El Niño. ‘i he ongo El Niño ne tō ‘i he ta’u 1982/1983 mo e 1997/1998 ne ‘au ki ha tu’unga ne iku fetuku vai mei Tongatapu ki Ha’apai pea nounou foki mo e me’atokoni ko e lahi e la’ala’aa.  Pea ko e Saikolone maumau lahi ko ia ko ‘Aisake (Kalasi 4) ‘i he 1982 pea mo Ron (Kalasi 5, ko e malohi taha ia ke kolosi hotau potu tahi) he 1997 ne na hoko loua ‘i he ta’u El Niño.  Koe la’ala’a fakatupu honge vai na’e to ‘i he 2015-2016 na’a ne uesia lahi ai ‘ae ngoue moe ngaahi sekitoa tu’ulavea ngofua ‘i he fonua ni pea na’e fe’unga moe afaa e 5 na’a ne uesia mai ‘ae ‘otu Tonga ni.

Ko e ngaahi me’a leva ke fakahoko he mahina ‘e 3 ka hoko mai

Ki he kakai kotoa mei Tongatapu ki he ongo Niua, ‘oku totonu ke fai e tokanga ki hono ngaue’aki ‘oe vai telia na’a hoko ha nounou pe honge vai ‘i he ngaahi mahina ka hoko.

Ke kamata leva ke fai ha tokateu pea fakakau e El Niño moe la’ala’a ‘oku ‘amanaki hoko he mahina e 3 ka hoko mai he ngaahi palani ngaue kotoa pe tau tefito ki he ngaahi Sekitoa tu’u lavea ngofua ki he feliuliuaki ‘a e ‘uha mo e saikolone hange ko e Ngoue & Toutai (Malu ‘a e Me’atokoni), Mo’ui, Vai mo e Takimamata.

‘Oku ‘oatu foki mo e fale’i ki he kakai e Fonua kenau fengaue’aki vaofi mo e ngaahi fa’unga pule hange ko e Potungaue Ngoue ki ha ngaahi fale’i fekau’aki mo e ngaahi ngaue ke fakahoko ke fakasi’isi’i ‘a e tu’u lavea ngofua ki ha uesia ‘e hoko ‘aia koe la’ala’a tupu meihe fa’ahi ta’u El Niño ‘e ala hoko mai.

Pea ke hokohoko atu pe e muimui’i he kakai e Fonua ‘a e ngaahi fakatokanga El Niño kotoa pe ‘oku tuku atu.  Ko e fakamatala hoko ‘e tukuatu ia he konga kimu’a pe ‘o Sepitema 2018.

Ki ha to e fakaikiiki

Ki ha to e fakaikiiki, kataki fetu’utaki ki he Va’a Fakamatala’ea ‘o e Vakai Matangi a Tonga, Ma’u’anga Ivi, Ma’u’anga Fakamatala, Fakatamaki Fakanatula, ‘Atakai, Feliuliuaki ‘o e ‘Ea, Ongoongo mo e Fetu’utaki, P.O. Box 1380, Level 2, O.G Sanft Building, Nuku'alofa, he Telefoni ko e 35 355 pe ‘imeili ki he This e-mail address is being protected from spambots. You need JavaScript enabled to view it pe vakai kihe uepisaiti www.met.gov.to

NGATA’ANGA

Tukuatu mei he: Potungaue Vakai Matangi a Tonga, Ma’u’anga Ivi, Ma’u’anga Fakamatala, Fakatamaki Fakanatula, ‘Atakai, Feliuliuaki ‘o e ‘Ea, Ongoongo mo e Fetu’utaki, P.O. Box 1380, Level 2, O.G Sanft Building, Nuku'alofa, Tonga. Tel: (676) 28170 Fax:  (676) 24861;Email : This e-mail address is being protected from spambots. You need JavaScript enabled to view it

Websites : www.tongaportal.gov.to

 

Taki ‘a e ‘Eiki Palemia he Kau Folau ‘a e Pule’anga ki he Fakataha Fakata’u hono 49 ‘a e Kau Taki ‘o e Ngaahi Fonua Memipa he Kautaha Fakapule’anga ‘a e Ngaahi Fonua ‘o e Pasifiki

E-mail Print PDF

31 ‘o ‘Akosi, 2018 ENGLISH ‘E tataki ‘e he ‘Eiki Palemia, Hon. Samuela ‘Akilisi Pohiva ‘a e kau folau ‘a e Pule’anga Tonga ki he Fakataha Fakata’u hono 49 ‘a e Kau Taki ‘o e Ngaahi Fonua Memipa he Kautaha Fakapule’anga ‘a e Ngaahi Fonua ‘o e Pasifiki ki Nauru. Ko e kaveinga ‘o e Fakataha ‘o e ta’u ni, “Ko hono Langa ha Pasifiki ‘Oku Kaukaua : Ko Hotau Kakaí, Ko Hotau ‘Otumotú; Ko Hotau Loto”.

‘E kamata e fakataha ‘o e ta’u ni he ‘aho Monite 3 ‘o Sepitema ‘o kamata’i ‘e he Fakataha ‘a e Kau Taki ‘o e Ngaahi ‘Otu Motu Iiki ange (SIS), hokoatu ki he Fakataha ‘a e Kau Taki ‘o e Ngaahi Fonua Pasifiki ‘oku memipa he kulupu ko e ‘Afilika, Kalipiane, Pasifiki (PACP) pea faka’osi ‘aki ‘i he houa efiafi ‘a e ouau huufi ‘o e Fakataha Fakata’u hono 49. ‘I he ‘aho Tusite ko hono 4 ‘o Sepitema, ‘e fakataha ai ‘a e Kau Taki ‘o e Ngaahi Fonua ‘o e Pasifiki (PIF) pea mo e kau fakafofonga mei he ngaahi kulupu Sosaieti Sivile, hokoatu ki he’enau alealea mo e ngaahi memipa taautaha mei he Sekitoa Taautaha. ‘I he hili pe ‘a e hou’a ‘ilo ho’ata ‘e hoko atu ‘a e Kau Taki ‘a e Ngaahi Fonau ‘o e Pasifiki (PIF) ki ha’anau fakataha mo e kau Taki ‘o e Ngaahi Fonua ‘oku te’eki Memipa Kakato ‘i he Kautaha ‘a e Kau Taki (Forum). Hili ia tenau hoko atu ki he fakataha pea mo e kau fakafofonga mei he ngaahi Fonua ‘oku nau Fetokoni’aki vaofi mo e Pasific (Dialogue Partners). ‘I he ‘aho Pulelulu ko hono 5 ‘o Sepitema ‘e kamata’aki ha fakataha ‘a e Kau Taki mo e mo e kau Talekita Pule ‘o e Ngaahi Kautaha Fakavaha’apule’anga he Pasifiki (CROP agencies) pea hokoatu ki ai ‘enau Fakataha Fakaekinautolu pe ‘a e Kau Taki (Retreat) ‘a ia ‘e meimei ‘aho kakato ‘a e polokalama ko ia. ‘E faka’osi ki he houa ‘ilo mo e fakafiefia fakafonua ‘i he houa efiafi. Ko e polokalama tapuni ‘o e Fakataha ‘e fakahoko ia ‘i he ‘aho 6 ‘o Sepitema.

‘Oku muimuifolau ‘i he ‘Eiki Palemia ‘a e: ‘Eiki Minisita ki he Komeesi, Konisiuma, Fefakatau’aki, ‘Ilofo’ou mo e Leipa, Dr. Tu’i Uata; Sekelitali Pule Le’ole’o mo e Sekelitali Le’ole’o ki he Kapineti, Olita Tupou; Sekelitali Ki Muli, Mahe Tupouniua; Pulengaue ‘o e Potungaue, Komeesi, Konisiuma, Fefakatau’aki, ‘Ilofo’ou mo e Leipa, Edgar Cocker; Fale’i Fakapolitikale mo e Faiongoongo, Lopeti Senituli; faita vitio mei he ‘Ofisi ‘o e ‘Eiki Palemia, Suliana Pomana. ‘E mavahe atu ‘a e ‘Eiki Palemia mo e konga ‘o e kau folau he ho’ataa Falaite 31 ‘Aokosi ki ‘Okalani pea mei ai ki Nauru. Ko e toenga e kau folau tenau mavahe atu he hengihengi Tokonaki ‘aho 1 ki Nadi pea mei ai ki Nauru. ‘Oku ‘amanaki ‘e foki mai e kau folau ‘i he ‘aho 8 ‘o Sepitema.

NGATA’ANGA

Tuku atu mei he: ‘Ofisi ‘o e ‘Eiki Palemia, Pule’anga Tonga, Nuku’alofa, Tonga. Tu’asila: Taufa’ahau Road, P.O. Box 62. Tel: (676) 23 600 Fax: (676) 23 888; Ngaahi Faka’eke’ekeEmail: This e-mail address is being protected from spambots. You need JavaScript enabled to view it

Last Updated ( Friday, 31 August 2018 15:40 )
 

Fakatokanga tokateu ki ha El Niño ma’a Tonga (13 ‘Aokosi 2018)

E-mail Print PDF

15 ‘o ‘Akosi, 2018 ENGLISH


To’o konga lalahi

Fakatatau ki he ngaahi me’afua fakamamani lahi ‘oku ‘iai e fakafuofua ke maliu e faha’ita’u ki he El Niño ‘i he tahi Pasifiki ‘ihe mahina ‘e tolu koeni ka hoko. ‘Oku 55% ‘ae faingamalie ke hoko eni ‘i ‘Aokosi ki ‘Okatopa 2018 pea toe lahi ange ‘ae faingamalie ke  a’u ‘ae El Niño kihe 2019, ‘oku 78% ‘ae faingamalie ke hoko ‘i he vaha’a taimi Fepueli ki ‘Epeleli 2019. ‘Oku ‘ikai ke mahino ‘ae malohi ‘oe faha’ita’u koeni kapau ‘e hoko ka koe ngaahi faka’ilonga kuo ha mai ‘I he taimi ni ‘e ‘ikai koha faha’i ta’u malohi kapau ‘e hoko. Ko e ngaahi uesia ‘a e El Niño ki Tonga ‘oku kau kiai ‘a e lahi ke momoko e ‘ea he taimi po’uli, si’isi’i ange ‘a e ‘uha ‘i he fa’ahi ta’u ‘uha (Novema- ‘Epeleli) pea lahi ange faingmalie ke hoko ha saikolone fakatalopiki.

Ko e ha ‘a e El Nino?

Ko e El Nino ko e fa’ahi ta’u ‘oku nga’unu ai ‘a e konga tahi mafana ‘oku anga maheni ke toka ma’u pe ki he tokelau ‘o Aositelelia ‘o kolosi he Pasifiki ‘o a’u ki ‘Amelika Tonga. Ko e nga’unu ‘a e konga tahi ‘oku ne hiki’i hake ai e mafana e tahi i he Pasiki ‘o lahi hake ‘i he mafana angamahe ni pea hoko ai e ngaahi liliu kihe natula angamaheni e ‘ea ‘i he ngaahi feitu’u lahi kau ai ‘a Tonga ni. Ko e El Niño ‘oku hoko fakanatula pe pea meimei ke hoko ‘i he ta’u 3 ki he 7 kotoa pe.

Ko e tu’unga lolotonga

Ko e tu’unga lolotonga e mafana e fukahi tahi ‘oku ha mai ha fekau’aki mo ha El Niño vaivai. Neongo ‘oku kei ‘ihe ‘avalisi angamaheni pe ‘ae potutahi Pasifiki lolotonga koeni ‘oe 2018 ka ‘oku ‘iai e ngaahi liliu ‘ihe ‘atimosifia ‘o hange mafana ‘ae tahi moe vaivai ange ‘ae toka’anga e matangi.  ‘Oku ‘iai foki moe ‘asi ‘ae si’iange ‘ae ‘uha ‘I he ngaahi feitu’u lahi ‘oe fonua, koe ngaahi faka’ilonga eni ‘oku nga’unu mai ‘ae fahai ta’u El Niño. Koe ngaahi faka’ilonga foki koeni ‘oku fiema’u ia ke hokohoko ‘iha ngaahi uike pea ‘e fakapapau’I mo fakamo’oni’i ‘oku hoko ha El Niño.

Ko e uesia ‘e he El Niño e ‘ea ‘o Tonga ni

Ko e fa’ahi ta’u El Niño ‘oku fa’a a’u pe hono loloa ia ki he ta’u ‘e taha neongo ‘oku lava pe ke nounou ange ai pe toe loloa ange ai. Ko e ngaahi uesia ki Tonga ‘oku kau ai e mokomoko ange ‘a e taimi po’uli, si’isi’i ange ‘a e ‘uha ‘i he fa’ahi ta’u ‘uha pea lahi ange mo e faingmalie ke uesia ‘a Tonga ha saikolone fakatalopiki ‘i he fa’ahi ta’u Afaa. ‘Oku ‘avalisi ki he saikolone ‘e 1 te ne uesia ‘a Tonga ‘i he ta’u ka ‘oku ‘unu hange ‘a e fika ko’eni ‘o ofi ‘i he 2 ‘i he fa’ahi ta’u El Niño.

Ko e ngaahi El Niño he kuo hili

Koe la’ala’a malohi mo fakatupu honge vai taha kuo lekooti ‘i Tonga ni na’e hoko ia ‘ihe faha’i ta’u El Niño. ‘I he ongo El Niño ne tō ‘i he ta’u 1982/1983 mo e 1997/1998 ne ‘au ki ha tu’unga ne iku fetuku vai mei Tongatapu ki Ha’apai pea nounou foki mo e me’atokoni ko e lahi e la’ala’aa. Pea ko e Saikolone maumau lahi ko ia ko ‘Aisake (Kalasi 4) ‘i he 1982 pea mo Ron (Kalasi 5, ko e malohi taha ia ke kolosi hotau potu tahi) he 1997 ne na hoko loua ‘i he ta’u El Niño. Koe la’ala’a fakatupu honge vai na’e to ‘ihe 2015-2016 na’a ne uesia lahi ai ‘ae ngoue moe ngaahi sekitoa tu’ulavea ngofua ‘ihe fonua ni pea na’e fe’unga moe afaa e 5 na’a ne uesia mai ‘ae ‘out Tonga ni.

Ko e ngaahi me’a leva ke fakahoko he mahina ‘e 3 ka hoko mai

Ke kamata leva ke fai ha tokateu pea fakakau e El Niño ‘oku ‘amanaki hoko he mahina e 3 ka hoko mai he ngaahi palani ngaue kotoa pe tau tefito ki he ngaahi Sekitoa tu’u lavea ngofua ki he feliuliuaki ‘a e ‘uha mo e saikolone hange ko e Ngoue & Toutai (Malu ‘a e Me’atokoni), Mo’ui, Vai mo e Takimamata.

‘Oku ‘oatu foki mo e fale’i ki he kakai e Fonua kenau fengaue’aki vaofi mo e ngaahi fa’unga pule hange ko e Potungaue Ngoue kiha ngaahi fale’i fekau’aki mo e ngaahi ngaue ke fakahoko ke fakasi’isi’i ‘a e tu’u lavea ngofua ki ha uesia ‘e hoko ‘aia koe la’ala’a tupu meihe faha’I ta’u El Niño ‘e ala hoko mai.

Pea ke hokohoko atu pe e muimui’i he kakai e Fonua ‘a e ngaahi fakatokanga El Niño kotoa pe ‘oku tuku atu. Ko e fakamatala hoko ‘e tukuatu ia he konga kimu’a pe ‘o Sepitema 2018.

Ki ha to e fakaikiiki

Ki ha to e fakaikiiki, kataki fetu’utaki ki he Va’a Fakamatala’ea  ‘o e Vakai Matangi a Tonga, Ma’u’anga Ivi, Ma’u’anga Fakamatala, Fakatamaki Fakanatula, ‘Atakai, Feliuliuaki ‘o e ‘Ea, Ongoongo mo e Fetu’utaki, P.O. Box 1380, Level 2, O.G Sanft Building, Nuku’alofa, he Telefoni ko e 35 355 pe ‘imeili ki he  This e-mail address is being protected from spambots. You need JavaScript enabled to view it pe vakai kihe uepisaiti www.met.gov.to

NGATA’ANGA

Tuku atu mei he: Potungaue Vakai Matangi a Tonga, Ma’u’anga Ivi, Ma’u’anga Fakamatala, Fakatamaki Fakanatula, ‘Atakai, Feliuliuaki ‘o e ‘Ea, Ongoongo mo e Fetu’utaki, P.O. Box 1380, Level 2, O.G Sanft Building, Nuku’alofa, Tonga. Tel: (676) 28170 Fax:  (676) 24861;Email : This e-mail address is being protected from spambots. You need JavaScript enabled to view it , Websites : www.tongaportal.gov.to

Last Updated ( Wednesday, 15 August 2018 15:53 )
 
  • «
  •  Start 
  •  Prev 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  Next 
  •  End 
  • »
Page 1 of 56

Who's Online

We have 408 guests online

PUBLIC ENTERPRISES