Home / NEWS TODAY / Royalty / Fakataufolofola talamonū ki he ‘Ene ‘Afió, Kingi Siaosi Tupou V

Fakataufolofola talamonū ki he ‘Ene ‘Afió, Kingi Siaosi Tupou V

E-mail Print PDF
04 'Aokosi, 2010. Ko e kātoanga molumalu mo fakafiefia kae hulu atu ‘ene fakahisitolia he kuonga ko eni e Liliu faka-Politikale.
Ko e me‘a eni ‘a e ‘Eiki Palēmia he Katoanga Taumafa ho‘atā ‘i Fangatapu, he Palasi  ‘aneafi(Mōnite 2 ‘o ‘Aokosi) he hiki taumafa na‘e fai ‘e he ‘Eiki Palēmia mo e kaungāue faka-Pule‘anga ‘o fakahoko atu ai ‘a e fiefia mo e vekeveke ‘a e kakai e fonua he a‘usia ‘e he Tama Tu‘í,  hono Ono-ngofulu-ma-Ua ta‘u(62).

Na‘e kamata pe  kātoanga he talitali faka-Pule‘anga he efiafi Falaite ‘i he Janful Hotel pea mo e foaki e ngaahi Falangilangi he Palasi, ‘i he pongipongi Tokonaki pea mo e Koniseti ke tokoni ki he faingata‘a‘ia he efiafi, ‘i he ‘Api Konisela he Hala Vuná.

Ko e Lotu Fakafeta‘i ‘o e ‘Aho ‘Alo‘i na‘e kau ia he ngaahi Ouau ‘o e Malanga pongipongi he Sāpate ‘i he Falelotu Fakamanatu Senituli ‘o tataki pe ‘ehe Faifekau faka-Tu‘i, Rev. Dr. ‘Ahio mo e kau Faifekau.

Pea ko e Mōnite, ko e ‘aho malōlō faka-Pule‘anga ia mo kātoanga‘i ai e ‘Aho Alo‘i,  ‘o kamata pe mei he Laka Fakatē‘a e Tau Malu‘i Fonua ‘a Tongá ‘i Pangai Lahi  he 10 pongipongi. Ko e Taumafa Fakalangilangi ‘o e ‘Aho, he 1:00 ho‘ataa ‘o fai ‘e he ‘Eiki Palēmia mo e ngaahi Potungāue Pule‘anga. Pea ne toki faka‘osi‘aki e Koniseti mo e kau Tame‘alea ‘o nau taa e ngaahi fasi faka-‘Itali ‘ i he ‘Api Konisela he 8 efiafi.

Ka koe konga mahu‘inga ‘o e ngaahi Ouau e kātoanga fakafonuá ni,  ko e Fakatau Folofola ko eni ‘a e ‘Eiki Palēmia ki he Tama Tu‘i,  lolotonga e Taumafa ho‘atá. Na‘a ne fakafofonga‘i ai e Pule‘anga kae tautautefito ki he Hou‘eiki mo e Kakai e Fonua he Taalomonu ke Monimonumonitonu aipe ‘a ‘Ene Pulé pea ke tu‘uloa aipe ‘a e Fale ‘o Ha‘a Moheofó mo e Tataki ‘okú nau fai ‘i hotau fonuá ni.

Ko e UHO ‘o e fakatau folofola ni ‘okú ne katoi ai e ngaahi ta‘alomonū ‘a e Tonga kotoa pea mo e fakamālō faka‘osi ‘a e ‘Eiki Palēmia mo e Hou‘eiki mēmipa e Kapineti he koloa mahu‘inga kuo momoi mai hono Mafaí, ‘e he Tama Tu‘i mo e Fale ‘o Ha‘a Moheofó ke tukufakaholo ia ‘i hotau HAKÓ he kuonga kotoa ‘o hangē tofu ko e tukufakaholo ‘a e kelekele ‘i hotau ngaahi fāmili ‘o lauikuonga.

‘Oku mau ‘oatu ai heni e me‘a ‘a e ‘Eiki Palēmia, Dr.  Feleti Vaka‘uta Sevele lolotonga e  Taumafá :

Tulou, Tulou, Tulou !
‘E Molofaha mo Maliepō, kole ke mo faka‘atā mai homo Pangai toputapú, kae ‘atā ki he motu‘á ni ke fai ha fakahoha‘a mo ha fiefia he ‘aho katoangá ni,
Tapu mo e Hau Fatufonua ‘o e ‘Otu Tongá, Kingi Siaosi Tupou V,
Tapu mo e Ta‘ahine Kuni Fehuhú, Kuini Halaevalu Mata‘aho,
Tapu mo e Ta‘ahine Pilinisesí, Mele Siu‘ilikutapu, Fale‘aló, kae‘uma‘á e Hou‘eiki e Fonua,
Tapu mo e Sea e Fale Alea mo e kau Memipa Fale Aleá,
Tapu mo e Tokoni Palēmia kae‘uma‘a e Fakataha Kapinetí,
Tapu mo e Tangata‘eiki Palesiteni, ka ko e Faifekau Faka-Tu‘i pea mo Ha‘a Takilotú,
Tapu mo e Kau Fakafofonga e Ngaahi fonua mulí mo e Kau Fakaafe hono kotoa, ‘oku tau lonuku ‘i he Pangai toputapu ko‘eni ‘i he ho‘atá ni,
Kae ‘ataa mu‘a keu fakakakato atu ‘a e fatongia kuo kouna au keu fakahokó !

‘E Ho‘o ‘Afio, ‘oku ou hūfanga atu he ngaahi fakatapu kuo aofaki kae ‘atā mo‘oku keu hapai atu ‘a e Pule‘anga mo e fonuá mo ‘emau fakafeta‘i ki he ‘Otua Mafimafi ‘i he ‘Ene faka-Lakoifie ‘a e ‘Afió na. Pea mo ‘Ene fakafe‘ao mai ‘a e ‘Afio na ‘i he ta‘u kuo liu-atú na, ka ke a‘usia ‘e Ho‘o ‘Afio ‘a ho ‘Aho ‘Alo‘í he ta‘u fo‘ou ko‘eni. Pea hangē ko e ta‘anga fiefia ‘o e Siupilate na‘e hiva‘i ‘aneafi ‘e he Tangata‘eiki Palesiteni mo e Siasi ‘i Saioné.

‘Oku mau fu‘u fiefia mo mavava ki he ‘Otua pea mau hanga ki he kaha‘u mo e ‘Amanaki Lelei. Fakatauange ‘e tokalingolingoa mai ‘a e ngaahi tapuaki  ‘a e ‘Otuá ‘o taulofu‘u ki he ‘Afió na  mo e Fale ‘o Tupou ke fakama‘unga kiai ‘a hō kakai mo e fonuá, ma‘a hono kakai, talu mei he kamata‘anga.

‘I he ‘ahó ni ‘oku mau hapai ki he ‘Otua ‘a ‘emau fiefia mo e fakafeta‘i ‘Ene tapuaki‘i ‘a e ‘Otu Tonga, ‘aki hono foaki mai ‘a e Fale ‘o Ha‘a Moheofo, ko  homau Tataki fungani mo faka-‘Otua. ‘Ikai koia pe ka ko e mata‘ikoloa makehe foki ‘o e ‘ahó ni, kuo‘osi polo‘i pea foaki mai ‘e he ‘Otua ‘a e ‘Afió na, Tama ko Siaosi Tupou V,  ko ho mau Tu‘i ‘ofeina he kuonga faka-hisitolia ko ení..

Ka ko e Kalauni Koula ta‘efakatataua mo fakahisitolia ‘a Ho‘o Pulé,  ‘e Ho‘o ‘Afio, koe‘uhi ko Ho‘o Afeitaulalo ‘o foaki mai kiate kimautolu Ho Mafai Pule, ‘a e Mafai Pule na‘e tuku‘au mai talu mei he tanupou ‘o e fonua mei Ono‘aho. Pea tongi ‘i he Konisitutone ‘o e ‘Otu Tonga, talu mei he ta‘u 1875.   ‘I he Konisitutone ko‘eni, ‘a Kingi Siaosi Tupou I.  Na‘a ne toe foaki ai, pea mo e Hou‘eiki ‘o e fonua ‘a e Kelekele ke mau ma‘u,  pea ke tukufakaholo ai homau ngaahi Hakó ‘o ta‘engata.

‘I he ‘aho ni, ‘i ho kuonga ‘e Ho‘o ‘Afio, kuo ke toe foaki mai mo ho Mafai Pule ke mau ma‘u pea ke mau toe tukufakaholo ai ‘o ta‘engata. Ko e ongo mata‘i Koula Fisifisimu‘a ko eni kuo te‘eki ‘aupito ke foaki tu‘unga‘a ia ‘e ha fonua pe Ha‘a Tu‘i,  kae taa‘olunga ‘a e Fale ‘o Ha‘a Moheofo. ‘Aia na‘e tanupou ‘enau Taki ‘a e fonua ‘i he ‘enau hapai ‘o e ‘Eiki ko SESU KILISITŌ. Koia tokotaha pe,  kuo ne foaki ‘ata‘ata pe ‘a e Ongo Mata‘ikoloa ni, ma‘a hono kakai talu mei he kamata‘anga.

‘E Ho‘o ‘Afio, Tama ko Kingi Siaosi Tupou V.  Neongo ‘oku ngata he ‘aho ni ‘a e lave ‘a e motu‘a ni pea mo e Kapineti ‘o e ‘aho ni,  ‘i hono katoanga‘i ‘o e ‘Aho Fakahifo ‘o e ‘Afiona. ‘Ikai ha me‘a ia ‘e taha ‘e mavivi, ‘i he fai fatongia na‘e fai. Pea te mau lau ma‘u pe ‘a e Monuu koia ne mau lave ai, ko ‘emau Koloa Fakatalutalu na‘e too mei Fale Lahi. Pea temau fakalekesi ia ‘e Ho‘o ‘Afio ki he pa‘angangalu.

Koia ai ‘e Ho‘o ‘Afio, ‘oku ou fakafofonga‘i atu heni ‘a e Tokoni Palemia mo e Fakataha Kapineti, ‘a ‘emau fakamalo he Monu‘ia Taukakapa kuo mau lavemonuu ai, ‘i he ‘emau faifatongia mo e taliangi ki he ‘Afio na,  mo Ho Pule‘anga.   Fakatauange ‘e Ho‘o ‘Afio, ke Monimonumonitonu aipe ‘a e Pule ‘a e ‘Afiona pea ke toupili mai ‘a e Lelei mo e ‘Alo‘ofa ‘a e ‘Otua ‘i he ngaahi ‘aho kotoa ‘o e ‘Afiona.

‘E Ho‘o ‘Afio, ko ‘emau taalomonu ia ! ..... Ko ‘emau lotu mo ‘emau hufia ia..........Tu‘a‘ofa atu.



Transcribe and posted by Ministry of Information and Communications
Locate at Fasi-moe-Afi Free Weslyan Church Building)
Tel : (676) 28-170. Fax : (676) 24-862, P.O Box 1380, email: This e-mail address is being protected from spambots. You need JavaScript enabled to view it )
Last Updated ( Wednesday, 24 August 2011 23:22 )  

Who's Online

We have 60 guests online