Home / NEWS TODAY / Press Releases English

Press Releases

This section outlines official Press and Media Statements issued by the Ministry of Information and Communications in addition to Press Releases from the Prime Minister's Office and other Government Ministries and Departments.

Fakamo'oni Aleapau Femahino'aki 'a e Potungaue Fakamaau'anga moe Polisi

E-mail Print PDF
21 Me 2013  ENGLISH | ‘E kaunga fakamo'oni ‘a e Potungāue Fakamaau'anga mo e Potungauengāue Polisi Tonga ki ha Aleapau Femahino'aki ‘i he 9:00 pongipongi ‘o e ‘aho Pulelulu 22 ‘o Me, 2013 ‘i he ‘ofisi ‘o e Komisiona Polisi, ‘Apitanga Polisi  ‘i Longolongo .

Ko e taumu'a ‘o e Aleapau Femahino'aki ko ‘eni ko ha Aleapau Femahino'aki ngāue ko e taumu'a ke toe ‘atā ange e ngaahi ngāue ‘oku fakahoko ‘e he va'a Malu'i Anga Lelei (Probation Unit) ‘a e Potungāue Fakamaau'anga, ‘i hono tokangaekina mo sivi'i e ngāue ‘a kinautolu kuo tautea mei he ngaahi Fakamaau'anga ke ngāue ma'ae ngaahi kolo mo e sosaieti.

Ko e va'a Malu'i Anga Lelei ‘o e ngāue Fakamaau'anga ‘oku ne fakahoko e ngāue mahu'inga ‘e ua ki he ngaahi Fakamaau'anga ‘i Tonga ni.

1.            ‘Oku fakahū atu ‘e he kau ‘ofisa ‘o e va'a ni e ngaahi lipooti ki he kau Fakamaau kimu'a pea toki fakahoko e ngaahi tu'utu'uni.  Ko e taimi ‘oku tautea ai ha tokotaha ‘e he Fakamaau ki ha hia na'a ne fakahoko, ‘oku ngāue leva e ‘ofisi ni ke fakahū atu ha lipooti faka-fo'ituitui ki he Fakamaau´ fekau'aki mo e tokotaha faihia, ke fakapapau'i ‘e he Fakamaau ko e tautea te ne tuku atu ki he tokotaha ko ‘eni (pe ko e ngāue popula pe ngāue ki he kolo) ‘oku fe'unga mo taau ke ako'i mo tautea'i e tokotaha faihia ki he hia na'a ne fakahoko pea taimi tatau ai pe ‘oku ne to e tokonia foki mo e tokotaha fai hia ke malava ‘o liliu ‘o hoko ko ha taha falala'anga ‘Ii he nofo ‘Ii he ngaahi tukui kolo ‘o Tonga ni.

Ko e tu'utu'u ni ‘a e Fakamaau ke ngāue ma'ae kolo, ‘e hoko pe ia ‘o kapau ‘oku ne pehe ko e taimi ‘e ngāue popula ai ha tokotaha faihia ‘oku ‘ikai taau ia mo e ngaahi me'a ne hoko pea ko e ngāue ma'ae kolo tene lava lelei ‘o fakafokifoki mai mo hinoi'i e tokotaha faihia ke nofo lelei he sosaieti mo hoko foki ko ha taha ‘ulungaanga lelei mo faipau ki he tu'utu'uni mo e pule ‘a e lao. ‘Oku tokoni foki ki he fakahoko fatongia e va'a ko ‘eni felave'i mo e ngaahi tu'utu'uni´ ke ngāue ma'ae kolo ‘a e kau Pule faka-vahe mo e kau ‘ofisa kolo, kulupu sosaieti sivile he ngaahi kolo, ngaahi siasi, ngaahi komiti faka-kolo kae'uma'ā e famili mo e ngaahi maheni ‘o e tokotaha faihia.

2.            Ko e taimi ko e ‘oku fakahoko ai e ngaahi tu'utu'uni  ke ngāue ma'ae kolo, ‘oku ngāue leva e va'a  Malu'i Anga Lelei ke sivi'i mo fakapapau'i ‘oku fakahoko he ‘e tokotaha faihia e tu'utu'uni kuo ‘oange ki ai. Ko e taimi pe ‘oku ‘osi ai e ngāue e tokotaha faihia ko ‘eni ‘o fakatatau ki he tu'tutu'uni ne ‘oange ke ngāue ma'ae kolo, ‘oku ngāue leva e kau ofisa ‘o e va'a Malu'i Anga Lelei ke fakahoko ha lipooti ki he Fakamaau pe na'e ngāue tokanga mo ‘osikiavelenga ‘a e tokotaha faihia ‘i he ngaahi ngāue ne tuku atu ke ne fakahoko.

Ko e Aleapau Femahino'aki ko ‘eni ne fokotu'u mo poupou ki ai e ngaahi Fakamaau'anga ‘o Tonga ni, Potungāue Polisi mo e Potungāue Fakamaau'anga foki. ‘Oku tui lahi ‘e hoko e Aleapau Femahino'aki ko eni te ne to e faka'ataa ange ai hono ngāue'aki ‘e he ngaahi Fakamaau'anga ki hono fakahoko e ngaahi tu'utu'ni ma'ae kau faihia ke nau ngāue ma'ae ngaahi kolo, ‘I he taimi pe ‘oku nau pehee ‘oku lelei ange ai e ngaahi tu'utu'u ni pehee mo tokoni foki ki he fakahoko ngāue ‘a e kau ‘ofisa ‘o e va'a malu'I angalelei, mo ‘amanaki pe ‘e toe tokolahi ange ‘a kinautolu kau faihia te nau ngāue pe ma'ae ngaahi kolo.

Ko e Aleapau Femahino'aki ko ‘eni ‘oku ne tuku atu ai e ngaahi founga fakahoko fatongia ma'ae ongo fa'ahi  ‘a ia ko e Potungāue Polisi Tonga mo e Potungāue Fakamaau'anga.  Ko e Aleapau Femahino'aki  ko eni ne fa'u ia mo alea'i mei he ‘Ofisi ‘o e ‘Ateni Seniale ke ne fakapapau'i ‘oku fakahoko ‘a e Aleapau ‘i he vaha'a ‘o e Potungāue Polisi mo e Potungāue Fakamaau'anga.  ‘E kamata ngāue foki e Aleapau Femahino'aki ni ‘i ha ‘uluaki mahina pe ‘e ono ‘o kamata lau ia mei he ‘aho Pulelulu 22 ‘o Me, 2013 pea ‘e to e fai ha sio ki he Aleapau Femahino'aki ni mo fakahoko ha ngaahi liliu ki ai  ‘i he ‘osi e ‘uluaki mahina ‘e ono. Pea ka faingamalie ai pe e ngāue ni, ‘e fakaloloa atu ai pe ki ha taimi loloa atu ‘o fakatatau pe ki he felotoi e Potungāue Polisi mo e Potungāue Fakamaau'anga.

‘Oku ‘oatu heni ha fakamālō mei he Potungāue Fakamaau'anga kae'uma'ā ‘a e Potungāue Polisi ki he Ma'u Mafai ki he Veve ki ho'omou tokoni mo fetakinima ‘i hono fakafaingamalie'i mai e ngaahi me'a ngāue ke fakahoko ‘aki e ngaahi ngāue ‘oku fakahoko ‘i he ngaahi kolo ‘o felave'i mo e ngaahi tautea ‘o e ni'ihi faihia.

‘Oku fakaafe'i atu heni e kau fai-ongoongo kotoa pe ki hono fakahoko e fakamo'oni ki he Aleapau Femahino'aki  ko eni ‘aia 'e fakahoko ia he 9:00 pongipongi  ‘aho Pulelulu 22 ‘o Me 2013, ki he ‘Apitanga Polisi Longolongo.


NGATA'ANGA

Tukuatu mei he: Potungaue Fakamaau'anga, Nuku'alofa, 21 Me 2013,


Last Updated ( Wednesday, 22 May 2013 15:22 )
 
Page 1782 of 1936

Who's Online

We have 188 guests online

PUBLIC ENTERPRISES