Home / NEWS TODAY / Press Releases English / Tongan version

Press Releases Tongan version

The Tongan version of the English Press Release versions.(Ko e liliu faka-Tonga e ngaahi ongoongo faka-Pilitania)

Ako ke fakama’opo’opo ‘a e ngaahi koloa fakahisitölia ‘a Tonga

E-mail Print PDF

25 'Okatopa 2016 Na’e fakaava ‘e he Minisitä ki he Ngaahi Ngäue Fakalotofonua´, Hon. Penisimani Fifita ha polokalama ako ‘aho ‘e nima ‘aneafi, he Senitä Fakafonua ‘a Tongá ‘oku fakataumu’a ki hono fakamä’opo’opo mo tänaki ‘a e ngaahi fakamatala mei he ngaahi koló pea ke hiki tohi ‘a e ngaahi me’a ‘oku tau makehe ai mei ha toe fonua ‘i he ‘ulungaanga tu’ufonua, tukufakaholó, ngaahi feitu’ú pea mo e ngaahi koloa fakahisitoliá.

Ko e fuofua faingamälie eni ke lavemonü ai ‘a Tonga pe ko ha fonua ‘i he Pasifiki´ ki hono fakahoko ‘a e polokalama ako ko eni´ ‘a ia ‘oku fakapa’anga ‘e he Senitä Ako Fakatu’apule’anga ‘a e Pule’anga Fakatahatahá ‘i he Akó, Saienisi mo e Anga Fakafonua pe Talatukufakaholo ki ‘Esia mo e Pasifiki ‘oku tu’u ‘i Beijing, Siaina pe International Training Centre for Intangible Cultural Heritage in the Asia-Pacific Region (CRIHAP) ‘o fakamalumalu ‘i he UNESCO pea fakahoko ‘e he Potungäue ki he Ngaahi Ngäue Fakalotofonuá.

Ko e tefito’i kaveinga foki ‘a e Senitä Ako ko ení ke fakanaunau’i ‘a e taukei mo e poto’i ‘ilo ‘a e ngaahi fonua ‘Esiá mo e Pasifikí ki he Konivësio 2003 ki hono malu’i, fakatolonga mo tauhi ‘a e ‘ulungaanga fakafonua tukufakaholó ‘a ia na’e toki fakamo’oni ‘a Tonga ai ‘i ‘Epeleli, 2010.

‘I he lea fakaava ‘a e ‘Eiki Minisitä´ na’a ne me’a ai ki he mahu’inga ‘a hono fakahoko ‘a e akó ni ki Tonga ni pea mo hotau kakaí ‘a ia ko hono fakamä’opo’opo mo tänaki mai e ngaahi fakamatala mei he ngaahi koló mo e kakai ‘o e fonuá he ko ‘etau mata’ikoloá ko e ‘ulungaanga tu’ufonuá, tukufakaholó, ngaahi feitu’ú, ngaahi koloa fakahisitölia ‘oku tau kei ma’ú ke tauhi pea ke ‘aonga ke ‘ave ‘ilo ko ia mei he to’utangata ko ení ki he to’u tangata hoko mai´.

“Ko e taumu’a tefito ‘o e polokalama ako ko ení, ko hono fakaa’u mai ‘a e founga pea mo e ‘ilo ‘e fai ’aki hono tanaki ‘a e ngaahi fakamatala mei he kakai taukei, ‘ilo, tauhi pea ma’u ‘e he kakai ‘o e tukuikolo pehë ki he tukui motú, ke hiki tohi pea ke tauhi ke hokohoko atu hono ngäue’aki ‘e he fanau akó pea pehë foki ki he kakai ‘o e fonuá pea pehë foki ki hotau kakai Tonga ‘oku nau ‘i tu’apule’angá.”

‘Ikai ke ngata ai´ ka na’á ne pehē kuo mole atu hotau kakaí ka na’e ‘ikai malava hano faka’eke’eke kinautolu ke ‘omai ‘a e ngaahi taukei mo e poto na’a nau ma’u ‘i he ngaahi tapa kehekehe, ka ko hono mo’oní he’ikai te tau nofo ai ka tau tu’u hake ke fai ‘a hono fakama’opo’opó.

‘Oku felave’i hangatonu foki ‘a e langa ngaue´ ni pea mo e Palani Fakalakalaka ‘a e Fonua 2015-2025, ki hono tauhi mo tokanga’i ‘a e ngaahi ouau pe ko e ngaahi ‘ulungaanga fakafonua tukufakaholó.

‘Oku kau mai ki he akó ni ‘a e kau Pule Fakavahe, ‘Ofisa Kolo kotoa ‘i Tongatapu ni pea mo e ngaahi tukui motú ke nau vahevahe ‘a e ngaahi taukei mo e ngaahi ‘ilo mei honau ngaahi koló ‘o kau ki ai ‘a e fokotu’utu’u ko eni ke fakahoko ‘a hono hiki tohi ‘o e ngaahi fakamatalá.

NGATA’ANGA

Tukuatu mei he Potungaue Fakamatala 'Ea, Ma'u'anga Ivi, Ma'u'anga Fakamatala, Fakatamaki Fakaenatula, 'Atakai, Feliliuaki 'o e 'Ea mo e Fetu'utaki

Last Updated ( Tuesday, 25 October 2016 12:59 )
 
Page 10 of 215

Who's Online

We have 236 guests online

PUBLIC ENTERPRISES