Home / NEWS TODAY / Press Releases English / Tongan version

Press Releases Tongan version

The Tongan version of the English Press Release versions.(Ko e liliu faka-Tonga e ngaahi ongoongo faka-Pilitania)

Fokotu'u ke fakalelei'i e Lao fekau'aki mo e tā mo fakamamahi'i e kakai fefine mo e fānau

E-mail Print PDF
31 Sanuali, 2012. Fevahevahe'aki mo e kau Memipa Falealea ‘o Tonga fekau'aki mo e ngaahi fokotu'u fakalelei ki he Lao ‘oku fekau'aki mo e tā mo fakamamahi ki he kakai fefine mo e fānau.

Na'e fakahoko he ‘ahó ni, Mōnite 30 ‘o Sanuali 2012 ‘i he Loki Konifelenisi ‘o e Falealea ‘o Tonga ha talanoa mo ha feako'aki mo e kau memipa ‘o e Falealea ‘o ma'u faingamalie ai ‘a e kau memipa ke nau feme'a'aki ki he'enau ngaahi a'usia, ngaahi hoha'a pea pehē ki he'enau ngaahi fokotu'u fakakaukau fekau'aki mo ha Lao ‘e fe'unga ke ne lava ‘o malu'i lelei ‘a e kakai fefine mo e fānau mei he tā mo e fakamamahi ‘i he ‘ātakai ‘o e nofo ‘api.

Na'e kau he ngaahi ‘isiu na'e fai ‘a e tokanga ki ai ‘a e kau mēmipa ‘a ‘enau hoha'a ke fakapapau'i ko ha Lao ‘e fa'u ke ne lava ‘o malu'i fakatoloua ‘a e tangata mo e fefine ‘oku fakahoko ki ai ‘a e fakamamahi ‘i ‘api ‘o ‘ikai fakangatangata pe ki he kakai fefine.

Na'e ‘i ai mo e fokotu'u ke kole ki he kau Taki Lotu ke nau tokoni mai ki he feinga ke fakangata ‘a e tā mo e fakamamahi ki he kakai fefine mo e fānaú.

Na'e ‘ohake mo e fiema'u ke fai ha fekumi ki he ngaahi ‘uhinga ‘okú ne fakatupu ‘a e fakamamahi ‘i ‘api, mo ha founga ke tokoni'i ‘aki ‘a e kau mamahi pea pehē ki he tānaki ‘o ha ngaahi fakamatala fakaikiiki fekau'aki mo e kau mamahi pea pehē kia kinautolu ‘oku nau fakahoko ‘a e fakamamahi ‘o hangē ko e fiema'u ke lekooti ‘a e siasi ‘oku nau kau ki ai mo e feitu'u ‘oku nau nofo ai.

Na'e fokotu'utu'u ‘a e polokalama ‘e he Va'a ‘o e Kakai Fefine ‘i he Potungāue Ako, Ngāue ‘a Fafine mo e ‘Ulungaanga Fakafonua ‘i he fetokoni'aki mo e Potungāue Lao pea pehē ki he ‘Ofisa Fale'i ki he poloseki mei he RRRT/SPC.

Na'e kau mai ki he polokalama ‘a e Ministā ki he ngaahi Ngāue, Fefakatau'aki mo e ngaahi Ngāue'anga, Sea ‘o e Fale Alea, Fakafofonga mei he Hou'eiki Nōpele, pea pehē foki ki he kau Fakafofonga ‘o e Kakai.

Fakatatau ki he tu'utu'uni na'e tali ‘e he Kapineti ke toe fai hano vakai'i ‘o e lao fekau'aki mo e fakamamahi ki he kakai fefine mo e fānau, pea ke fa'u mo ha fakalelei ki he ngaahi konga ‘oku fiema'u ke fakafo'ou ke fakahū atu ki Falealea ‘i he to'u falealea ‘o e ta'u ni 2012, pea koe'uhi ko e fatongia mahu'inga ‘o e kau mēmipa ke nau fakapaasi ‘a e ngaahi Lao, na'e makatu'unga ai ‘a e fokotu'utu'u ke fai ha talanoa mo ha fevahevahe'aki mo e kau memipa fekau'aki mo e ngaahi fokotu'u fakakaukau ki ha Fo'i Lao tu'u ‘iate ia pe, ‘oku ne tokangaekina fakalukufua ‘a e ngaahi founga fakamamahi kotoape ‘oku fakahoko he ‘ātakai ‘o e nofo ‘api kae lava ke toe malu'i lelei ange ‘a e totonu ‘a kinautolu ‘oku uesia ‘i he fakamamahi.

Na'e kau foki hono talanga'i ‘a e ola ‘o e fekumi na'e fakahoko fekau'aki mo e tu'unga ‘oku ‘i ai ‘a e lahi ‘o e fakamamahi ki he kakai fefine ‘i Tonga ni, pea pehē ki hono fakahoa ki he ngaahi fonua kaunga'api ‘i he Pasifiki.

Na'e fakahā fiefia ‘e he Tokoni Talēkita ‘oku ne tokanga'i ‘a e Va'a ‘a e Kakai Fefine, ‘ene matu'aki hounga'ia ‘i he fengāue'aki mo e poupou mei he kau memipa na'a nau kau mai ki he akó.

>> Vakai ki he faka-pilitania HENI

ENDS.

________________________________________________________________________________

Kataki kae fetu'utaki ki he Va'a ‘a e Kakai Fefine ‘i he Potungaue Ako,Ngaue ‘a Fafine mo e Anga Fakafonua, MEWAC ‘i he telefoni 27145 ‘o ka fiema'u ha toe fakaikiiki.

 
Page 253 of 276

Who's Online

We have 211 guests online

PUBLIC ENTERPRISES