Home / NEWS TODAY / Press Releases English / Konifelenisi ‘a e Potungāue Ngoué mo e Kau Ngoué

Konifelenisi ‘a e Potungāue Ngoué mo e Kau Ngoué

E-mail Print PDF

1 ‘o Tisema, 2017 ‘Oku lolotonga fakahoko ‘i he Senitā Fakafonua ‘i Tofoa, ha konifelenisi ‘a e Potungāue Ngoué mo e kau ngoué ko e fakataumu’a ke fai ha talatalanoa ki ha founga ‘e to e lelei ange ai ‘a ‘enau vā fengaue’akí.

‘I he fakamatala ‘a e Tokoni Talēkita mei he Potungāue Ngoué ‘Emauele Mo’ale ko e konifelenisi ko ‘eni ‘oku fakahoko tu’o ua ia ‘i he ta’u ‘o fakataumu’a ke uki mai ‘a e kau ngoué ke fai ha pōtalanoa ki he tu’unga ‘oku ‘i ai ‘a ‘enau ngāué.

“Ko e polokalamá ni ‘oku fakahoko ia ‘i he faka’osi’osi ‘o e ta’u fakapa’anga kotoa pē pea mo e faka’osi’osi ‘o e ta’ú. Ko hono uki mai ‘o e kau ngoue mo e ngaahi kupu fekau’akí kau atu kiai mo e kau ngoue ‘oku uta ‘enau ngoue ki muli, ke fai ha pōtalanoa, manatu’i ko e taumu’a ‘o ‘emau ngāue ko kinautolu pea ko e faka’amu ia ke nau talamai ha ngaahi me’a ke fakalelei’i ‘aki ‘emau faifatongia kia kinautolu.”

Ko e taha ‘o e ngaahi fiema’u na’e ‘ohake mei he kau ngoué ‘i he houa pongipongí ‘o e ‘ahó ni, ko e fakataka koia ‘o e fanga monumanu.

“Lahi e ngaahi fiema’u na’e ‘omai mei he kau ngoue, ko e me’a ‘e taha ko hono fakataka koia ‘o e fangamonumanú. ‘Oku fai ai ‘a e tokanga ke fakamālohia ‘a e Laó ke ne malu’i ‘a e tokotaha ngoué pea mo e tokotaha ‘oku ‘i ai ‘a ‘ene fanga monumanú. He ko e taimi lahi ‘oku ‘ikai ke lava ‘a e fu’u taló ia ‘o lue, ko e pulú ia ‘oku ‘alu holó. Koia ‘oku fai e tokanga ke lava ‘e he tokotaha ‘oku ‘i ai ‘a ‘ene fangamonumanú ‘o fakapapau’i ‘oku nofo ma’u ‘ene monumanú, ‘e ‘ikai leva ke to e ‘i ai ha fakamole ‘i he tokotaha ngoué mo e tokotaha ‘oku ‘i ai ‘a ‘ene fangamonumanu.’’ Ko e fakahā ia ‘e ‘Emanuele.

Taimi tatau na’e pehē ‘e ‘Emanuele ‘oku kau ‘eni he polokalama lelei, ke fakatonutonu ‘aki ‘enau fai fatongia ki he kau ngoué.

“Na ‘oku hē ‘emau fai fatongia ‘amautolu ki ha feitu’u kehe, kae si’i li’aki e kau ngoue ia. Ko e kau ngoue ‘i he anga ‘emau tuí, ko kinautolu ‘a e kakai na’e ma’u ai ‘emau ngāué, pea ko e ‘uhinga ia ‘emau ngāué ke mau tokoni kia kinautolu.”

Na’e pehē foki ‘e ‘Emanuele, ‘oku ‘i ai ‘a e taumu’a ke fakamālohia ‘a e kakaí ke nau ‘unu ki he ngoue fakakomēsialē, he ko e konga lahi ‘o e kakai ‘oku nau ngoue ‘i he Fonuá ni ko e ngoue pē ke tauhi ‘aki ‘a e famili.

‘Oku kau mai foki ki he Konifelenisi ko ‘ení ‘a e kau fakafofonga mei he ngaahi Kosilio Ngoue pea pehē foki ki he kau fakafofonga mei he ngaahi ‘otu motu.

NGATA’ANGA

Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.

 

Who's Online

We have 242 guests online

PUBLIC ENTERPRISES