Home / NEWS TODAY / Press Releases English / 'Uluaki Fuofua To Folofola 'a Tupou VI ki hono Kakai

'Uluaki Fuofua To Folofola 'a Tupou VI ki hono Kakai

E-mail Print PDF

10 'o 'Epeleli, 2012. Ko e fuofua Tō Folofola 'a 'Ene 'Afio Tupou VI, na'e fakahoko he Letio mo e Televisone Tonga 'i he 'aho Tusite 10 'o 'Epeleli, 2012.

" Tapu mo e ‘Otua ‘oku tui mo lotu ki ai ‘a Tonga,
Tapu mo e Ta'ahine Kuini Fehuhu mo e Fale ‘o Tupou,
Tapu mo e Hou'eiki e Fonua,
Tapu mo Ha'a Matāpule,
Tapu mo e ‘Eiki Palemia, mo e Kau Minisitā ‘o e Kalauni,
Tapu mo e ‘Eiki Sea ‘o e Fale Alea ‘o Tonga,
Tapu mo e kau Taula'eiki mo Ha'a Lotu,
Pea tapu mo e Tangata mo e Fefine'i Fonua mo e kāinga muli ‘oku nau nofo ‘i he ‘Otu Tonga.

‘Oku ou fakafeta'i ki he ‘Otua, koe ngaahi tapuaki ‘oku ne faka'inasi ‘a Tonga ‘i he kelekele mahu mo e koloa mei ‘Oseni, pea ‘ikai ngata ai, ka ne toe fakateunga'aki ‘a e Fonua, ha kakai ‘oku nau ma'u ‘a e maama, ‘atamai ‘oku poto ‘oku fungani.

‘I he ma'u ‘a e faingamalie ko ‘eni ‘oku ou fie fai ha fakamālō ki he Kakai kotoa ‘o e Fonua ‘i he tauhi ‘o e molumalu mo e Tapu ‘o e Fonua mei he Tō ‘a e La'á, ‘a ‘Ene ‘Afio King Siaosi Tupou V ki he Pongipongitapu, ko hono faka'ilonga'i fakafonua ia ‘a e Hala ‘a e Tu'i, pea fakahoko ai ‘a e tu'utu'uni ke faka'atā ‘a e Fonuá, kae tuku pe ‘a e Famili kenau fakakakato ‘a e Tapú.

Kuo a'utaki mai ‘a e ngaahi pōpoaki kaungamamahi mei he Ha'a Tu'i, Palesiteni ‘o e ngaahi Fonuá, koe Tu'itapu mei Loma mo e ngaahi kaungame'a ‘o ‘Ene ‘Afio Siaosi Tupou V, pea fakafiemalie kiatekitautolu koe lava ke me'a tonu he ouau telio ‘a e Tu'i Ha'amoa mo Masiofo Filifilia, ko Pilinisi mo Pilinisesi Hitachi mei he Fale ‘o e ‘Emipola Siapani, ko e Duke ‘o Gloucester mei he Fale ‘o e Tu'i Pilitania, mo e Palesiteni ‘o Fisi mo Adi Koila, ko e famili toto ‘o e Fale ‘o Tupou, ko e Kovana Seniale ‘o ‘Aositēlelia mo e Kovana Seniale ‘o Nu'usila, ko e Tu'i ‘o e kau Mauli moe kau taki mo e kau fakafofonga mei he ngaahi Fonua muli, kae ‘uma'a foki mo e si'i kāinga Tonga mei he ‘otu muli.

‘Oku matu'aki hounga kiate au mo e Famili ‘enau lava ke nau me'a mai ‘i he taimi ‘o e faingata'a, ‘oku ongo ki hoku loto ‘a e talitali na'e fai ‘e he Fonua, na'e kūnima mo e silongo, ko e faka'apa'apa mo e fakahā ‘o e mamahi, ‘i he fakatu'upakē ‘a e kapa ‘a e po'uli ‘a e Fale ‘o e Haú, mo e ngaahi ta'u si'i ‘a e Pule ‘a e Nima'i Kuonga, ka kou fakamālō ki he tukulaumea mo e hala kuo tofa he La'ā Kuo Tō, ko ‘Ene finangalo lelei ki he liliu fakapolitikale mo fakatemokalati, ke tokoni'i ‘a e langa fakalakalaka mo faka'ekonomika ‘a e Kakai e Fonua, ke fakahoko ‘a e ngaahi liliu ‘i he laumalie ‘o e feveitokai'aki pea ke tauhi ‘a e melino ke tu'uloa.

Ko e laumalie na'e hā sino ‘i he tukuofo ki he Haú, ko e laumalie ‘o e ngāue fakataha ‘o e fekau'aki mo e ‘ofa fonua, na'e e'a ia ‘i he fānau ako mo e kaufaiako, ‘i he Takilotu mo e kāingalotu, ‘i he Pulengāue mo ‘ene kaungāue, ‘i he Minisitā mo ‘ene Potungāue, pea ‘i he ‘Eiki Nōpele pea mo hono kāinga. Ko e laumalie tatau pe ‘oku ou kole ketau ngāue'i'aki ‘a e Fonua mo tauhi ‘aki ‘a Tonga, pea ke fai ‘aki mo ‘etau fakafeangai ki hotau ‘Otua, kae monū'ia pea mo faitupuekina ‘a e ki'i fonua ‘oku tu'u ‘i ‘oseni.
‘Oku ou ‘ofa lahi atu kiatekimoutolu hono kotoa".

Mālō.

- NGATA'ANGA -

>>>> View VIDEO

Transcribe and Issued by the: Ministry of Information and Communications, Nuku'alofa 2012.

Last Updated ( Wednesday, 11 April 2012 15:20 )  

Who's Online

We have 123 guests online