Home / THE PUBLIC SERVICE / 14 Govt. Ministries / Prime Minister's Office / Information & Communications / Fakamahino‘i ‘e ‘ikai tuku kitu‘a ha kaungāue faka-Pule‘anga

Fakamahino‘i ‘e ‘ikai tuku kitu‘a ha kaungāue faka-Pule‘anga

E-mail Print PDF

20 Sepitema, 2010. Fakamahino‘i ‘e ‘ikai hoko ha tuku kitu‘a ha kaungaue faka-Pule‘anga ‘o fakatatau ki he Tohi Tangi kuo fakahū atu ki Fale Alea.

Ko hono faka'eke'eke ‘o e Minisitā ki he Ma'u'anga Fakamatala mo e ngaahi Fetu'utaki, Hon ‘Eseta Fusitu'a pe a pehē ki he ‘ene CEO, Paula Ma'u ‘e Nanise Fifita he Polokalama Televisone ‘a e Potungāue he ‘aho Mōnite 13 ‘o Sepitema, 2010.


Nanise: Mālō mu‘a e Laumalie ‘a Hou'eiki pea lelei ‘a e Tonga kotoa. ‘Oku ou kei kole ai pe keu hūfanga he ngaahi fakatapu kae ‘atā ke fakahoko atu ‘a e Polokalama ‘a e Potungāue ki he Fakamatalá mo e Ngaahi Fetu‘utaki, ‘i he efiafí ni. ‘Oku ou fiefia ke talitali lelei ‘a e ‘Eiki Minisitā o e Potungāue, Hon. ‘Eseta Fusitu'a pea pehē foki ki he Pule ‘o e Potungāue koia ki he Fakamatala mo e Ngaahi Fetu‘utaki, Paula Ma‘u.

‘Oku ‘oatu heni a e talitali lelei kimoua ki he Polokalamá ni hangē pe koia koe taha ‘o e ngaahi kaveinga ‘oku fai kiai ‘a e tokanga fekau'aki ‘eni mo e pehē tokua ‘oku ‘iai ‘a e tō nounou ‘i he Patiseti lolotonga koia e Pule‘anga ki he Ta'u faka-Pa‘anga 2010-2011, pea ‘oku ‘ iai ‘a e ngaahi fakamatala ‘o pehē ‘oku ‘iai ‘ae ngaahi Potungāue lalahi, tau pehē pe ko e ngaahi Potungāue lalahi ‘eni pea tokolahi a e kaungāue ‘i he ngaahi Potungāue ko eni ‘e ono(6), ‘oku pehē ‘e ‘iai ‘a e tō nounou ‘o laka hake he fa(4) milliona pea ko e taha ‘a e hoha‘a na‘e ‘ohake , konga ki mu‘a ‘o e Tau fo‘ou ‘e iai a e ta‘evahe he kaungaue ko ‘eni ‘e toko fiha afe ‘i he ngaahi Potungāue ko ‘eni. Tuku pe mua ke tau kamata mei he ‘Eiki Minisitā, Hon ‘Eseta Fusitu‘a ke ne ‘oatu mu‘a ha ngaahi fakaikiiki fekau‘aki mo e ngaahi tukuaki‘i ko ‘eni kuo fai.


‘Eseta: Mālō ‘aupito, ‘oku ou kole keu hūfanga ai pe he ngaahi tala fakatapu ‘o e fonua, kae ‘atā ke hoko atu ‘etau ki‘i polokalama fakauike ko ‘eni, ko e tokoni ki he Kakai ‘o e Fonua ke mea‘i , mo e fakamahino, ‘a e ngaahi ngāue ko ‘eni ‘oku fakahoko he ngaahi Va‘a ko eni ‘a e Pule‘anga.

‘Io Nanise, ko e mo‘oni aupito ‘a e me‘a na‘a ke lave kiai, ‘oku ‘iai e tohi tangi na‘e fakahū ia ki Falealea ‘ane nai, pea ko e tohi tangi ko ia ko hono taumu‘a ‘oku pehē, koe Ta‘u faka pa‘anga ko ‘eni ‘e i ai ‘a e ngaahi Potungāue ‘a e Pule‘anga ‘e 6, ko e tau kaha‘ú he ‘ikai tenau lava kinautolu ‘o vahe, pea ko e ngaahi Potungāue ko ‘eni ‘oku fakahā he tohi tangi ‘oku ngāue ai ‘a e toko ua-afe tupu, pea ‘oku fakafafuofua ki he nounou‘aki ‘enau Patiseti ‘a e pa‘anga ‘e fa-poini-tolu-miliona(4.3miliona). 'E Nanise, kimu‘a keu kole kia Paula ke ne fai mai ‘eku fakaikiiki , kuo mou mea‘i pe foki Hou‘eiki, ko Paula ko e taukei faka-‘Ekonomika ia, pea ko ia kuo mau ngāue mai he ngaahi ta‘u, pea mo e fakalele ‘a e Patiseti ‘a e Potungāue Palēmia, he mei ta‘u ‘eni e hongofulu tupu. Ko e ‘uluaki me‘a pe Nanise, ‘oku ‘uluaki ‘oatu ‘eku faka‘apa‘apa lahi ‘aupito kia kinautolu ‘oku ‘anautolu ‘a e Tohi Tangi, kaumai ai ‘akinautolu na‘e fakamo‘oni he Tohi Tangi, kae tuku pe mu‘a ke ‘oatu tau‘atāina ‘a e ngaahi mo‘oni‘i me‘a felāve‘i pea mo e kakano ‘o e Tohi Tangi ko ‘eni.

Ko e ‘uluaki me‘a pe na‘e hoko kiate au he‘eku sio hifo ki he tohi tangi ko ‘eni, na‘e pehé ni, kuou pehē, pe koehā koaa na‘a mau paasi ai e Patiseti ‘i Sune ‘o e Ta‘ú ni, he taa koē ‘oku fakahā mai he Tohi Tangi ko 'eni, ko e Patiseti ko eni na‘e paasi na‘e ‘osi fa‘u ia kiai ke ta‘evahe ‘a e toko ua-afe ‘a e kaungāue ‘a e Pule‘anga ‘i he vaeua ‘o e Ta‘u 2011. Ko e fo'i tefito‘i fakamatala ia ‘oku fai he tohi tangi, he ‘okú ne fakahā mai ‘oku tō nounou ‘a e patiseti 2010 ki he 2011 ‘aki ‘a e pa‘anga ‘e fa-poini-tolu-miliona (4.3miliona), ‘i he vahe ‘a e kaungāue fe‘unga mo e toko ua-afe-tupu, ‘aia ko hono fakalea ‘e taha , Nanise, ko e ta‘e vahe ko ‘eni na‘e fokotu‘u ia he Patiseti ke pehē ai . Kapau ko e mo‘oni ia , te tau fifili lahi leva pe koehā koā na‘a mau paasi ai ‘a e Patiseti pehē ,he ‘oku tapuhā he Lao mo e Konisitutone, ke ngāue fakatamaio‘eiki ha taha, tapuhā ‘aupito, 'aupito ia, pea ko ia ai ‘oku mahalo ko e ‘uluaki fafangu pe ‘eni ‘oku tā, ‘a ‘eni ‘oku fai atu, ‘aki ‘a e fakahoha‘a kae tuku mu‘a ke hoko atu kia Paula Ma‘u kene kātaki ‘o kamata ‘a e fakamahino ke me‘a mai kiai ‘a e Kakai ‘o e Fonua.

Paula: ‘Io mālō ‘aupito, ‘oku ou kole ai pe keu hūfanga atu he ngaahi fakatapu kae ‘atā ke tokoni atu ki hono fakama‘ala‘ala ‘a e kaveinga ko ‘eni, teu toe ki‘i tānaki atu pe kiai Nanise ,ko e taukei ko eni ia ‘a‘aku, na‘a ku ngāue foki he ngaahi ta‘u ‘i Fale Pa‘anga ,‘ou ngāue tonu ki he me‘a ko e Patiseti, tautefito ki hono fa‘u ko eni ‘a e Patiseti ko ‘eni ‘a e Pule‘anga, pea koia ‘oku iai ‘eku ‘ilo ki hono fa‘u ko ‘eni ‘o e Patiseti, tautefito ki he Vahenga mo e ngaahi fakamole kehe ko ia ‘a e ngaahi Potungāue kehe koia ‘a e Pule'anga. Ka ko e me‘a koee ki he Patiseti, ko e ‘Esitimeti ia ‘a e Puleanga ‘i he ta‘u ‘e taha faka-Pa‘anga, ko ia ka hoko mai ai ko e fika fakafuofua ia ‘a e Pule‘anga ki ha‘ane Pa'anga Ngāue ko ia ki he fo‘i ta‘u ‘e taha ka hoko mai, pea ‘oku fakatefito ia hangē ko ia ko e Patiseti ko ia na‘e toki tali ko ia he Fale Alea.

Ko e ngaahi fakamolé ee, pea ko e ngaahi pa‘anga ‘revenue‘ ‘oku tānaki ko e he Pule‘anga ai koee māhina kotoa pe,‘oku tānaki mai e pa‘anga, mo e ngaahi pa‘anga fakamole, toki hanga leva ‘e fale paanga ‘o ‘monitor‘(siofi), fakamahina pea hangē ko ia ko ‘eku lave, ko e pa‘anga ‘esitimeti fakalukufuá, fika fakafuofua pea toki fai mei ai ‘a e ‘monitor‘ ‘e fale pa‘anga ‘a e Patiseti. Ka ko e me‘a ko e ki he ‘deficit‘ pe ko e ‘surplus‘, ko e anga maheni pe ia ha Patiseti tatau ai pe ha fa‘ahinga Fonua, pe ‘i māmani kuopau ke ‘iai e ‘deficit‘, kuo pau pe ke ‘iai mo e ‘surplus‘ he ko e ‘uhinga, ko e ‘Esitimeti pe ko e Patiseti ‘oku fai ki ai ‘a e ngāue, ‘aia ‘oku ‘iai ‘a e ngaahi Pule‘anga Lalahi ia mo e ngaahi Potungāue ia, ‘oku ‘alu hake ‘enau Patiseti ‘o tō nounou, pea ‘oku ‘iai, e ngaahi Potungāue ‘oku ‘alu hake ‘enau Patiseti ‘o ‘surplus‘, ‘aia ko e ‘surplus‘ mo ‘deficit‘ ‘a e Patiseti, ‘oku ‘ikai ko ha me‘a fo‘ou, hangē ko e me‘a koee na‘e me‘a kiai ‘a e ‘Eiki Minisitā, kapau leva tetau pehē, hangē ko e kaveinga ko ia ‘etau polokalama ‘oku pehē, ‘oku ‘iai ha tō nounou, ko e me‘a ia ‘a e Fale Pa‘anga, he ‘oku nau ‘monitor‘ fakamāhina foki ‘a e Patiseti.

Ko e a‘u atu ki he taimi koia ‘oku tō nounou, ‘oku nau kumi leva ‘a e pa‘anga ke fakakakato ‘a e me‘a koia, ‘o ‘alu ‘o a‘u ki he ‘osi ‘a e ta‘u fakapa‘anga. ‘I he ‘osi koia ‘a e ta‘u faka-pa‘anga, ‘oku nau fakama‘opo‘opo leva, koehā ‘a e lahi mo ha me‘a 'oku hulu'akí, pe ‘oku tō nounou e Patiseti, ko e ngaahi ‘ulungaanga pe ia ‘o e patiseti, kuopau pe ke pehē, ‘i he ‘eku fakamatala fakalūkufuá, pe ‘ia ‘a‘aku ki he me‘a ko e Patiseti, pea ko hono natula pe ia ‘o‘ona, kuopau pe ke' iai ‘ae ‘surplus‘ pea mo e ‘deficit‘ ia. ‘I he ngaahi ta‘u lahi ‘oku 'surplus' hokohoko pe ia he mei ta‘u ‘e nima(5) pe hongofulu(10) ka ko e taimi ko e ‘oku ‘deficit‘ ‘a e Patiseti, ‘oku faka-pa‘anga leva ia he Pule‘anga, ‘a e tō nounou ko iá. Kuopau pe ke fakapa‘anga ia he Pule‘anga ke fakaa‘u ‘aki e ta‘u faka-pa‘anga ko ia.

Ko e natula fakalukufua ia ‘a e me‘a ko e Patiseti, kae mahalo teu toki tala atu pe foi tafa‘aki e taha, hangē ko e koia na‘e me‘a kiai e ‘Eiki Minisitā . Na‘e ‘ohake ‘o pehē, ko e ngaahi Potungaue ‘e 6, ko honau vahenga, ‘oku ngali tō nounou .‘Oku ‘iai foki mo e potungāue kehe ia ‘oku ‘surplus‘ ‘enau vahenga nautolu, ‘aia ko e fakalūkufuá ko ia na‘e tukumai ‘oku fa-poini-tolu(4.3)miliona,‘oku tōnoutonou he vahenga he fo‘i Potungāue ko ‘eni ‘e 6 koe ngaahi Potungāue ‘oku nau ‘surplus‘ kinautolu ‘aki ‘a e fa-poini-fa(4.4)miliona ‘aia ‘oku ‘ova ‘a e ‘surplus‘ he ‘deficit‘ ko ‘eni, ka kiate au mo ‘eku ‘ilo faka-patiseti, ‘oku iai leva ‘a e fehu‘i ke tau ngāue kiaí, koehā e me‘a oku hulu ai e potungaue koee? ha me‘a ‘oku tōnounou ai e Potungaue koe?, pea ko e vakili koē ‘o ilo ‘a e ‘uhinga takitaha pea te toki hanga leva ‘o fakama‘opo‘opo pe koehā ‘a e ‘uhinga totonu, he ‘oku ‘iai e ‘uhinga lahi tefito ‘oku lahi ai e Potungāue koee, kae si'isi‘i ai e potungaue koee.

Teu ‘oatu pe ha ki‘i fakatātā ‘e taha ,hangē koe ‘vacancies‘(ngaahi lākanga ‘ataa). ‘Oku ‘iai e potungāue ‘oku ‘iai ‘enau ‘vacancy‘ ‘anautolu he ta‘u kuo‘osi, he ‘oku ou fakatokanga‘i hifo he fo‘i fika, ‘oku nau faka fehoanaki hangatonu pe Patiseti e ta‘u kuo‘osi , ki he patiseti ‘o e tau faka-pa‘anga ko eni, ‘o fai ‘aki ‘a e fika ko ‘eni, ka ‘oku malava pe ko e ‘vacancy‘ koe potungāue na‘e tu‘usi ia. Kapau tetau pehē ko ha Potungaue na‘e ngāue ai ha toko 30, na‘e ‘iai ha foi vacancy ai ‘e 6, kapau na‘e pa‘anga ia ‘e tolu-mano pe fa-mano, ‘e lava pe ke a‘u ki he taha-kilu.

Ko ‘ene a‘u koē ki he ta‘u faka-pa‘anga, kuo to‘o ia, ‘oku ‘ikai ‘iai ha taha ia ‘e uesia he fo‘i tafa‘aki koia. Ko e ngaahi ‘elito ia kuopau ke tau vakili faka‘auliliki, pe koehā koā  ‘a e 'uhinga totonu ‘a e tonounou mo hiki hake ai ‘a e ‘surplus‘. Ka ko e ma‘e koia kou fie lave fakalukufua ki ai he taimini, ko e patiseti ia mo e natula ia ‘o e patiseti, mo e fika kuo tuku mai ko e fa-poini-tolu(4.3) nounou e Potungaue ‘e 6 ko ‘eni, ko e Potungaue kehe ‘oku fakataha‘i kinautolu ‘oku hulu ange ia, fakataha‘i kinautolu ‘oku fa-poini-fa(4.4) ‘enau hulu, kae malava ia ‘o hoko ‘i he fa‘ahinga me‘a pehé ni, ka teu toki lave atu ‘amui ki he ngaahi ‘uhinga kehe ‘oku tānaki mai ki heni.


Nanise: ‘I he mahino foki hangē ko e hoha‘a koia kuo tuku mai he tohi tangi ko eni , pea ‘amanaki ke feme‘a‘aki ai ‘a e Falé, ‘i he anga maheni ,ko hono fa'u mo fokotu‘utu‘u koia ‘o e patisaeti , ‘oku iai ‘a e fe ngāue‘aki ai ‘a e Potungāue Pa‘anga , kae pehē pe foki ki he ngaahi potungaue fakalūkufua ,pea fakahū ki he Fale Aleam ‘o fai e ngaahi feme‘a‘aki ai . ‘Oku hangē ko ē ‘oku ki‘i ongo kehe, ‘a e pehē kuo fakahoko ‘a e ngaahi makatu‘unga ko ia, ngaahi sitepu ko ia, ‘o a‘u mai ki hono tali he Fale Alea ‘i he uike faka‘osi ‘o Sune. ‘Oku ‘iai ‘a e filinga ua heni, koee ‘etau feinga ‘eni ke mahino ki he toenga ‘o e Kakai, tau pehē kuo ‘osi fakahoko ‘a e ngaahi fa‘unga ngāue koia - Fale Pa‘anga, Fale Alea pea tuku mai ko eni ke fai hono ngāue‘i, ‘oku ‘iai ha‘o me‘a ki ai ‘Eiki Minisitā?


‘Eseta: Mālō Nanisē, ta muimui ‘i ‘a e ‘ū fakamahino koē ‘oku fai ‘e Paula . Ko e mahino, ko e fakamanatu mai pe kiate kitautolu, ko e Patiesti, ko e fa‘u ‘o e tukunga ‘o e fakamole mo e ma‘u mai he mahina ‘e 12 ka hoko mai. Ko e fo‘i sino koia ko e Patiseti, ko e me‘a ‘oku tu‘u aí ‘a e fo‘i fika ‘e ua; ko e tukunga ‘o e ngaahi pa‘anga ‘oku ‘amanaki ke hūmai, ko hono ua; ko e tukunga ‘o e ngaahi fakamole ‘oku ‘amanaki ke fakahoko ai. Ko e ongo fo‘i sino ia ‘e ua ko ee, ‘e fakahoko pea mahino leva ‘a e ‘ū fakama‘ala‘ala ‘a Paula. Ko e patiseti, ‘oku ‘ikai koha me‘a, hūfanga he fakatapu, tau pehē ko e teuteu ke ma‘u ‘etau faka-efiafi, pea fetuku katoa mai leva ‘etau me‘atokoni ‘o tuku, pea tau toki kātoa mai leva ‘o ma‘u ‘a e faka-efiafi. ‘Oku fakamahino mai ‘e Paula kia au, ‘oku ‘ikai ke pehē ‘a e Patiseti ia, ke fetuku katoa mai ‘a e pa‘anga hūmai ‘o tuku, pea ‘osi koia pea toki fetuku mai leva ‘a e fakamole, ‘o toki ala atu ki he pa‘anga hūmai. Ko e me‘a ko e ‘oku fakamahino mai ‘e Paula kiate aú, ‘oku fetuku kotoa mai ‘o fokotu‘utu‘u ‘a e ‘u sino ngāue ‘a e Pule‘anga koee ‘oku fiema‘u ke fai, nofo ia he, pea ‘i he ‘alu koee mei he uike ki he uike, ki he mahina ki he mahina, pea vilo ‘a e tānaki pa‘anga ‘a e fonuá, ke ‘omai ke totongi ‘aki ‘a e fokotu‘utu‘u Patiseti.

Ko e fakamahino ko ia ‘e Paula kiate au, ko e tūkunga fakamole kuo tu‘u, ka ko e tukunga ko ia ‘o e pa‘anga hūmai ,‘oku ‘alu hake ‘alu hifo ia, ka ‘ikai ke tau ma‘u ‘e kitautolu ‘a e mahino ko ‘eni. Nanise, he ‘ikai pe mahino ‘a e Patiseti ia, pea mo e fo‘i kaveinga ko ‘eni ‘a e Tohi Tangi ‘oku fai kiai ‘a e tokanga. Ko ‘eku to‘o koe ‘e au ‘a e Tohi Tangi, pea u sio ki he ‘ū fiká, mahino foki ‘e ‘otometiki e ‘alu hoto ‘atamai, ke no‘o ‘a e ‘ū fika koee, ki he ‘ū poutuliki koē faka-Patiseti , ka te mahino‘i. ‘Oku pau pe, ke u kole fakamolemole, ‘oku ‘ikai pe keu mahino‘i ‘e au ‘a e Patiseti koee, ‘aee he Tohi Tangí. Kuo u fiu au he feinga keu mahino‘i, ‘oku ‘ikai pe keu lava ‘e au ‘o mahino‘i, he ‘oku ‘ikai keu hanga atu ki ai, pea fetaulaki mo e tefito'i pou tuliki ko eni ‘oku fai ki ai ‘eku fakamatala. ‘Oku ‘ikai keu lava au ‘o fetaulaki mo ia, ‘o a‘u ki he ‘eku Potungāue Nanise. Ko ‘eku vakai hifo ki he ‘eku Potungāue, na‘e hū ange ‘a Paula ‘ane nai, pe au pehē ange, sio hifo angé ki he ‘etau Potungāue, pe koehā ‘a e fika koē. Pea toe tangutu mo Paula, ‘o fuofuoloa, ‘o 'ikai pehē mai ‘a Paula ia, pe ‘oku fetaulaki ia mo e fiká pe ‘ikai, kau tuku mu'a kia Paula, ke ne hoko atu ‘a e ‘ū fakamahino koia.


Paula: Malo ‘aupito ‘Eiki Minisita. Ko e fika foki koee ‘oku ‘asi he Patiseti, ‘oku mahu‘inga ‘aupito ke tau ‘ilo‘i, ‘oku ‘iai e fika ‘oku haa he Patiseti, koe ‘Original Budget‘, ‘aia koe fika ia koee ‘oku tuku mai he Patiseti, pea ‘oku ‘i ai e fika ko e ‘Revised Budget‘, he ‘osi koee ‘a e Ta‘u faka-Pa‘anga.

Kapau te te fakahoa ha ngaahi Ta‘u Faka-Pa‘anga lahi, ‘oku saiange ke te nofo he fo‘i fika ko ‘eni koee ‘Revised Budget‘, ‘aia kuo ‘osi a‘u mai ai koeni koee ‘o fakama‘opo‘opo mai ‘e Fale Pa‘anga he Ta‘u faka-Pa‘anga kuo‘osi, ‘osi koia, pea nau hiki nautolu ia ‘o ngaue‘aki e fo‘i ‘Esitimeti ko ia koee he ta‘u ni. ‘Aia ‘e hala leva e fakafehoanaki ia, ‘a e fika tu‘uma‘u mei he fika ko eni e Patiseti, ‘aia ‘e toki ‘osi ko ia e ta‘u faka-Pa‘anga ko eni, pea toki lava leva ha mei mahina ‘e ua pe tolu mei ai, pea ‘e toki lava leva ‘a Fale Pa‘anga ‘o fakapapau‘i ‘a e Patiseti totonu ko ia ‘o e ta‘u faka-Pa‘anga ko eni, kae lolotonga ko ia ‘ene fononga ko ia he ‘Esitimeti, koe me‘a koee ‘a Fale Pa‘anga ‘oku fai ki ai, ko hono siofi ‘a e fakamole, pea mei he pa‘anga ‘revenue‘, ‘aia koee na‘e me‘a ki ai e ‘Eiki Minisita, ‘oku tanaki fakamahina koee he Fale Pa‘anga.

Ko e fie toe tanaki atu pe ki ai, koe fo‘i fika koeni koee e Potungaue ‘e 6(ono) ko ia ‘oku pehe, ‘oku tonounouu. ‘I he ‘Esitimeti, ‘e lava pe ke pehee koe kaungaue koee ‘oku ‘retire‘ mei he Potungaue ko ia, pea ‘ikai leva ke ‘asi honau vahenga ia ‘o nautolu he ta‘u ni. ‘Oku ‘iai e ni‘ihi ‘oku nau hiki atu nautolu ia mei Tonga ni, pe fakafisi mei he ngaue. ‘Oku ou tui mahalo koe ki‘i pa‘anga si‘isi‘i pe ai, ka na‘e ‘iai e toe fo‘i ngaue mahu‘inga ‘a e kau ‘Ulu‘i Potungaue koia ‘oku ui koe ‘redeployment‘. Ko e tali ia ‘e he ngaahi ‘Ulu‘i Potungaue, he fakataha ko eni ko ia ‘a e kau CEO, ke lava pe keu kole ‘e au ia ha kaungaue mei ha Potungaue, ke nau ngaue he‘eku Potungaue. Kapau ‘oku pehee pe he Potungaue ko ia, ‘oku faingamalie pe ‘enau ngaue ia ‘anautolu, kae tukuange mai ha konga ia ‘enau kaungaue, ke nau ngaue he‘eku Potungaue, pea na‘e lahi ‘aupito ‘a e hoko e ngaahi me‘a ko eni he ta‘u ni.

‘I he ‘eku tui, koe me‘a ko eni koee ‘oku fakamatala mai mei he fo‘i fika ko eni, ‘oku ne tala mai totonu ai e ‘Redeployment Excercise‘ ko ia, na‘e fai koee he kau ‘Ulu‘i Potungaue. Tau fakatata ‘aki pe, ‘a e Potungaue PSC, na‘e ‘iai e toko hongofulu tupu ai, ne nau mavahe nautolu ia mei he PSC, ‘osi ‘alu nautolu ia ‘o vahe ia he Potungaue ko ia ‘oku nau ‘alu ki ai. Hange ko ‘eku Potungaue ko ‘eni ‘a‘aku, ‘oku ‘iai ‘emau kaungaue ia ‘a mautolu ‘oku fakatokolahi mai, ‘aia koe fakatokolahi mai koee ‘a‘aku, koe si‘isi‘i ia e Patiseti koee ‘a e Potungaue ia koee. Ko ‘ene fehū‘aki holo ia e Patiseti, kae ‘alu hake leva mautolu he‘emau Patiseti ia ‘a mautolu, kae holo hifo e Potungaue ia koee.
‘Aia ‘e natula pehe pe, ‘o hange ko e me‘a neu lave ki aii, ‘oku holo ‘aki ia e 4.3, kae tupu ‘aki ia e 4.4, ‘aia tene lava pe ‘o talamai, koe me‘a ia, he koe kaungaue ia koee, ‘oku nau hiki nautolu ia ki he Potungaue, ‘e lahi e Vahe a e Potungaue koee, kae si‘isi‘i e Vahe ia ‘a e Potungaue koee, ‘aia ko e ngaahi feliuliuaki holo pe ia, ka koe ngaahi kaveinga ia, ne ‘osi fai pe ki ai e felotoi ‘a e kau ‘Ulu‘i Potungaue, ki he ‘redeployment‘ ko ia e kaungaue, ‘oku tala mai ia he fika, ka ‘oku ‘ikai ke ‘uhinga ia ke pehee, ‘e fakatokosi‘i e kaungaue.


Nanise:
Mahalo koe ngaahi fakamatala ko eni kuo me‘a ‘aki ‘ehe ‘Eiki Minisita, pea pehe foki kuo fakahoko mai ‘e Paula, ‘oku totonu pe ke tau pehe, ‘oku ‘ikai ke ‘iai ha fa‘ahinga makatu‘unga ia, mei he Tohi Tangi ko ‘ena, ke fai ai ha manavasi‘i ‘a e toko 2,000 tupu ko eni, ‘i he kau ngaue faka-Pule‘anga ‘i he Potungaue Ngoue, Vaotata moe Toutai, Potungaue Fonua moe Savea, Potungaue Ngaue, Tau Malu‘i Fonua, Potungaue ki Muli pea pehe ki he Potungaue Mo‘ui, ‘oku totonu ke pehe? ‘Eiki Minisita?


‘Eseta: ‘Io Nanise, ko ‘eku tui ‘a‘aku ia, koe me‘a ko eni ‘oku tau kaunga fakamatala, ‘oku ‘osi ‘ilo‘i pe ia he kaungaue ko ia. ‘Oku ou tui au ia, ‘oku ‘ikai ke tau ‘oatu ia ‘e tautolu ha me‘a fo‘ou ki he kaungaue faka-Pule‘anga, hangē ko ia 'oku tau fakamatala ko ia he taimi ni. Mahalo koe me‘a ne mei fo‘ou ia, ‘o hange ko eni, ‘oku ‘osi ‘ilo ‘e he tokotaha ngaue faka-Pule‘anga kotoa ia, ko hono vahenga koee ‘oku ha he Patiseti, ‘oku Tapuha, Tapuha, ke alasi, koe Lao ia, ‘o a‘u ki he ‘ete Potungaue koe oku te ‘iai, ‘oku ‘ikai pe ke ‘iai hano mafai ia ‘o‘ona, ke alasi ha fo‘i seniti ‘e taha.

‘Ikai ko ia pe, manatu'i foki, koe ‘ave koe e Patiseti ‘a e ngaahi Potungaue, ‘aia koee oku paaki he Patiseti fakata‘u, ‘oku tu‘u ai katokatoa ‘a e ‘uu post koee he ngaahi Potungaue. ‘Oku tuu ai moe ngaahi vahenga ko ia, pea taimi koee ‘oku hikinima ai a Fale Alea koee, ‘o tali, tapuhaa ‘aupito ia ke ala ki ai ha taha, ‘aia ‘oku hange ko ‘eku fakahoha‘a, ‘oku ou tui au ia, ‘akimoutolu ko ia ‘oku me‘a mai, kaungaue faka-Pule‘anga mo kimoutolu kotoa Hou‘eiki, pe ‘oku ngāue ‘i ha fa‘ahinga feitu‘u pe, ‘o hangē koe ngaahi Poate, ki he Siasi mo e ngaahi pisinisi, ‘oku mou me‘a mai, ‘oku ikai ko ha ngaahi misiteli eni ia, ‘o e ‘employment' mo hono natula.

Ko ia ai koe fo‘i me‘a fo‘ou, ko hono fulihi ko ia ke ‘up-side down' ‘a e ‘uu mo‘oni ko ia, pea oku ou tui au, 'oku tau tokoni pe ‘i he efiafi ni, ki he hou‘eiki mo e kakai e fonua, ‘i he funga ‘i he ‘osi mea‘i pe, ko e ‘a,‘e,‘i ‘oku tau fai hono tanaki atu, ‘oku 'ikai ko ha me‘a fo‘ou, ‘ikai ko ha misiteli, ‘oku mea‘i pe ‘e he Kakai, ka koe ‘uhinga pe, ‘a e toe fai ai e fakahoha‘a, he kuo fokotu‘u mai ‘a e ‘uu me‘a kehe ‘aupito ia, faka-fika, faka-Lao, faka-founga ngaue, ‘i he Tohi Tangi ko ‘eni, pea ‘oku ‘ikai tetau ‘amanaki, ‘e puputu‘u ai e Kakai, he ‘oku nau ma‘u pe mahino ki he me‘a faka-Vahenga. ‘Oku ou kole pe kia Paula, tautautefito pe ke tokoni mai ki he ngaahi ‘uu to‘onga mo‘ui koee, ‘o e me‘a koe Patiseti, ke tau tokoni aa ki he Kakai, ‘i he ngaahi fanga ki‘i fakamahino ko eni.


Paula:
Kapau pe tetau pehē, hangē pe koe me‘a ko eni ‘oku ha he Tohi Tangi, ‘alu atu pe ‘a e Vahenga ‘o e Potungaue, ‘o a‘u ki ‘Epeleli kuo ‘osi, pea pehē leva ‘e ta‘evahe. ‘Oku ‘ikai ke pehē ia, koe me‘a ia ‘a e Fale Pa‘anga mo e Potungaue Pa‘anga, ke kumi mai ha Pa‘anga, ke fakaa‘u ‘aki e Vahe ki Sune. Ko e fatongia ia kuopau ke fakahoko ia. ‘Oku ‘ikai ngata pe he Vahenga, ka ‘oku tatau pe mo e ngaahi fatongia kehe pe ‘o e Pule‘anga. Fakatata ‘aki pe ‘eni, ‘okapau ke totongi ha ngaahi tukuhau ki he ngaahi kautaha, tau pehē pe ko e UN, pe Ngaahi Pule'anga Fakatahataha, ka a‘u atu ki ha taimi ‘oku ‘ikai ke lava, pea koe fatongia ia ‘o Fale Pa‘anga, tautau tefito ki he Vahenga. ‘Oku te‘eki ai pe ke ‘iai ha ta‘u ia teu ‘ilo‘i, ‘e ‘alu atu ia kuo tonounou, pea tuku ki tu‘a e kaungaue faka-Pule‘anga, koe ‘uhinga koe ‘ikai ke vahe. Kuopau pe ke fai e ngaue ki ai, pea ‘oku ou tui pe na‘e me‘a pe ki ai e ‘Eiki Minisitā Pa‘anga, ki he ‘enau ngaue ‘oku fakahoko, ‘okapau ‘e a‘u ki he taimi ko ia. Ko ‘eku tui pe ‘a‘aku ia, koe mafihunga pe ‘eni ia ‘o e Patiseti mo e ‘Redeployment Exercise‘, ‘Movement' holo ko ia e kaungaue fakapule‘anga mei he Potungaue ki he Potungaue, ‘oku hoko ai e me‘a ko eni. Ka ‘i he fakalukufua, na‘a ku fakahoko atu, ko e 4.3 ko eni ‘oku nounou, ka ‘i he tafa‘aki ia ‘e taha, ko e 4.4, ko e tupu ‘aki ia he vahenga, ‘aia tene lava pe ke ne kaniseli, pea toe ma‘u pe, mo e toe hulu ai, ‘i he ‘asi koia he pepa ko eni.


‘Eseta:
Toe tānaki atu pe ‘e Nanisé, ‘oku ou mahalo na‘a ‘oku felāve‘i pe tohi tangi ko ‘eni, mo e tokanga he koe taimi faingata‘a ‘eni ia, ‘aia ‘oku mo‘oni pe ia. Pea ‘i he ta‘u kuo‘osi mo e ta‘u ni, na‘e fai pe foki e tokanga makehe, ki he Patisetí, he ‘oku faingata‘a e hūmai e Pa‘anga mei Mulí, pea ‘oku faingata‘a e ma‘u e pa‘anga, he feitu‘u kotokotoa pē, ‘o kau ai mo e Pule‘angá. Ka ‘i he taimi tatau, ‘oku ou toe fakamanatu pe ‘i he me‘a koee ‘a e Minisitā Pa‘angá, pea ‘oku ‘asi pe ia he‘etau Patiseti, na‘e ‘osi ‘iai ‘a e pa‘anga tokoni mei muli ko e 23 miliona, ‘i Sune ‘o e ta‘ú ni, ko e fika na‘e fakahā  ‘oku ‘iai e ‘Budget Support‘ mei muli ‘oku fe‘unga mo e pa‘anga ‘e 23 miliona. ‘I he ‘eku ‘ilo‘i, kuo toe kaka hake ‘a e sino‘i pa‘anga ko ia. ‘I he taimí ni, ‘oku ‘alu hake ‘a e ‘Budget Support‘ mei muli, ‘oku ‘alu hake ki he 32 miliona, ‘i he a‘u mai ki he ‘ahó ni. ‘I he taimi tatau, ko e fetōkaki koee ‘a e pa‘anga hu mai mo hu atu fakalotofonua, ‘oku ou tui au ia, oku ‘iai e faingata'a ia ai, pea hange koe pa‘anga tokoni koia mei muli, ‘oku ‘iai e ‘amanaki ‘i he ‘etau ‘unu ai ko ia, ki he konga ki mui he ta‘u ni, ‘e lahilahi e toki a‘u mai e pa‘anga ia ko ia ai, pea kapau ‘oku pehē ‘oku ‘iai ‘eku tui ‘oku ngāue ‘a Fale Pa‘anga ki ‘he ‘ū ‘Fund‘ fakafonua ke ne fakahoko ‘aki ‘etau mo‘ui, kapau ko ia. ‘E Paula?


Nanise:
Tokoni mai mu‘a Paula ki he fakamatala ko eni ‘oku me‘a ki ai e ‘Eiki Minisitá.


Paula
: ‘Oku ou tui pe ne osi me‘a aki ‘ehe ‘Eiki Minisitā Pa‘angá, ‘oku ‘iai foki e ngaahi tokoni ki he Patiseti ,mei he ngaahi Pule‘anga muli, pea ‘oku ‘iai foki e fakamālō ko e taha ia e ngāue lahi ‘a e Pule‘anga, ko ‘ene fengāue‘aki mo ngaahi kautaha ko eni, mo e ngaahi Pule‘anga Mulí, ke ‘omi e pa‘anga tokoni ko eni ‘Budget‘ pea ‘ikai ngata pe aii, ‘oku iai pea ‘oku toe ‘iai pe foki mo e ngaahi ‘Project‘ mahu‘inga ia ‘a e Pule‘anga, oku nau hanga atu ki ai. ‘Oku toe ‘iai foki e pa‘anga lahi ia, ‘oku toe ‘omi ia mei ai, mahalo koe me‘a lahi, ‘oku ‘ikai ke ‘iai ha‘aku manavasi‘i ai ‘a‘aku, ‘o pehē, ‘oku ‘osi e Patiseti, pea ‘ikai vahe ai e kaungāue. ‘Oku fo‘ou ia kiate au, ‘oku ikai ke ‘iai ha me‘a pehē ia he Patisetí.


Nanise: Mahalo ko e me‘a mahu‘inga ‘ena ‘oku fie me‘a mai ki ai, ‘a e kakai e fonua‘, tautatefito ki he kaungaue faka-Pule‘anga, ke fakapapau‘i kiate kinautolu, he ikai hoko ha me‘a pehee, ‘o hangē koe tohi tangi ‘oku teu fakahoko.


‘Eseta: Mālō ‘Aupito, pea kapau te tau pehee, ‘oka hamapato‘a ha taha, ‘one pehē atu ‘e ‘ikai, ke ‘oua te tau fu‘u tokanga ki aii, he ko hono mo‘oni, ‘oku ‘ikai mo‘oni ia, he kuopau ke fakahoko ‘ehe Pule‘angá ia, ‘a e vahe ‘a e kaungaue. Mahalo pe ‘oku ‘ikai hano kovi, mahalo ko e toe tesi‘i pe, ‘etau mahino, ‘e he Tohi Tangi ko ení, kae hangē ko ‘eku fakahoha‘a ‘ane nai, ‘oku tau tui, kuo ‘osi mahino‘i pe ia ‘ehe kakai, ‘a e ngaahi me‘a ko eni, ka koe‘uhi foki kuo fu‘u taulofu‘u pehe mai, ‘a e ngaahi me‘a koee he tohi tangi, ‘e ala hoko pe ke te nofo ‘o ilifia mo tailiili, ‘o pehee ko e mo‘oni, ka ‘oku ‘ikai toe veiveiua, ‘oku ‘ikai ke mo‘oni ia.


Nanise:
‘Oku ou kole pe mu‘a ke mo aofangatuku mai ‘etau polokalamá, kae tuku atu ke kamata mai ‘e Paula pea toki hoko mai ki he ‘Eiki Minisitā.


Paula: Mālō ‘aupito, ‘e Nanise, mahalo ‘e mahino ange keu fai atu pe ha ki‘i fakatātā mahino, fekau‘aki ko eni mo e tō nounou ‘a e Patiseti mei he Potungāue ko eni ‘oku ou tokanga‘i. ‘oOu mahino pe, ko ‘ene a‘u atu pe ki Mē mo Suné, ‘oku ‘iai e ngaahi vouti kuo ‘osi ‘aupito, pea ‘oku ‘iai e ngaahi vouti ‘oku kei toe lahi ia, pea koe me‘a leva ‘oku te faii ko ‘ete to‘o mai e vouti ‘oku toe lahi, ke fakakakato mai ia ki he vouti ‘oku si‘isi‘í, pea kapau ‘oku toe kei si‘isi‘i pe ia, ‘oku ‘osi ‘ilo lelei pe ia e Fale Pa‘anga, pea teu tukituki atu leva ki Fale Pa‘anga, pea e ‘omai leva ia ‘e Fale Pa‘anga.

Ko e me‘a mahu‘inga ia kiate kimautolu ‘oku mau ngāue tonu ki he ngaahi me‘a faka-Pa‘anga ko ia he Potungāue, ko ‘emau siofi e Patiseti, tautefito ki he ‘ene a‘u ki he faka‘osinga e Ta‘u faka-Pa‘anga, pea ‘oku ‘iai e Potungāue lahi ia, ‘oku ‘alu atu ia ‘i he faka‘osinga e Ta‘u faka-Pa‘anga, ‘oku kei toe lahi pe ‘enau Patiseti ia, tatau pe i he vahenga... ka koe me‘a pe ia ‘oku hoko pe ia ki he Potungāué, ka koe me‘a koee ke pehee ‘i he ‘ene ‘osi ha fo‘i māhina, pe toe ha fo‘i mahino e ua(2), pea tuku e kaungāue ki tu‘a, ‘a e kaungāue faka-Pule‘anga, ‘oku ‘ikai ha tui ia ‘a‘aku, ‘e hoko ha me‘a pehē, mei he ‘eku taukei ‘a‘aku ki he ‘eku ngāue faka-Patiseti. Ko ‘ene a‘u koee, ‘oka ‘iai ha me‘a ‘e tō nounou, pea ‘oku to‘o mai leva mei he Patiseti koee ‘oku kei toe lahí, pea kapau leva te na nounou loua, pea teu kole atu leva ki Fale Pa‘anga, pea ‘e ‘omai leva e Fale Pa‘anga ‘a e Pa‘anga ko ia. Ko e natula pe ia e ngāue ki he me‘a ko e Patiseti, ka ‘oku ‘ikai koe pehee ko ha me‘a ‘oku fo‘ou.


‘Eseta, Mālō ‘aupito Nanise, Hou‘eiki mo e Kāinga, mahalo koe faka‘osi‘osi eni, ‘oku ‘oatu ‘e Paulá, pea kapau leva ‘oku ‘iai ha taha ‘oku kei ongo‘i faingata‘a‘ia pe ke ‘oatu e mahino, mou kātaki ‘oku ‘ataa pe ke mou fetu‘utaki mai ki he ‘emau Potungāue, he koe taha ia homau ki‘i fatongia, ke mau lava ke ‘ouatu e mo‘oni, he koe me‘a pe ia ‘okú ne hu‘i e faingata‘a, mo ne hu‘i mo e puputu‘u, ke tau ma‘u e mo‘oni mo e mahino. Ko ia ‘oku ou fakamālō atu Nanise, ki he ma‘u faingamalie ke tau fetokoni‘aki he efiafí ni. Tu‘a ‘ofa atu.

Hikitohi ‘e he Potungāue Fakamatala mo e Fetu‘utaki, 'Ofisi he FWC Fasi-moe-Afi, Hala Salote, Fasi-moe-Afi, Nuku'alofa, 2010. Ki hono fakaikiiki fetu‘utaki ki he Telefoni: (676) 28-170 pe email ki he This e-mail address is being protected from spambots. You need JavaScript enabled to view it

Last Updated ( Saturday, 23 July 2011 00:19 )  

Who's Online

We have 211 guests online

PUBLIC ENTERPRISES