Home / GOVERNMENT / State of Emergency / Me‘a ‘a e ‘Eiki Palēmia Le‘ole‘ó, Nōpele Tuita fekau'aki mo e fakatamaki tsunami ‘i Niutoputapu

Me‘a ‘a e ‘Eiki Palēmia Le‘ole‘ó, Nōpele Tuita fekau'aki mo e fakatamaki tsunami ‘i Niutoputapu

E-mail Print PDF
30 Sepitema 2009

Tapu mo e Ta‘ahine Pilinisesi Pulé,
Tapu mo Hou‘eikí,
Pea tapu mo Ha‘a Matāpule mo e Kakai kotoa ‘o e Fonuá,
‘Oku ‘iai ‘eku fakatapu makehe mo e ‘ofa ki hotau kāinga ‘i Niuatoputapú.

Hangē ko ia ‘oku mea‘i ‘e Hou‘eiki pea ‘ilo ‘e he Tonga kotoa, na‘e ‘iai e mofuike ‘i he houa pongipongi ‘o e ‘ahó ni , pea na‘a ne fakatupu e sunami pe peau kula. Ko e lotolotonga ‘o e mofuike ko ‘eni na‘e tō ‘i he vaha‘a ‘o e ongo Ha‘amoa pea mo Niuatoputapú.

Koia ai ‘oku uesia lahi ‘a Niuatoputapu ‘e he sunami ko ‘eni. Na‘e ‘oho e tahí ki loto fonua. Kuo uesia lahi e ngaahi kolo ‘o Niuatoputapu, kae tautefito ki he kolo ko Hihifo. Kuo maumau lahi e falemahaki, maumau mo motuhia e fale fetu‘utaki telefoni, maumau lahi mo e ngaahi fale pule‘anga pea pehē foki ki he ngaahi ‘api nofo‘anga ‘o e kāinga Niuatoputapu. Kuo uesia mo e mala‘e vakapuna ‘o ‘ikai lava ke tō ai ha vakapuna ‘i he ‘ahó ni.

Fakatatau kihe fakamatala kuo ma‘u mai ‘i he taimí ni, kuo ‘iai e mo‘ui ‘e 7 kuo mole, pea ‘oku kei mole mo e toko 3, pea ‘iai mo e kafo fakatu‘utamaki ‘e toko 4.

Na‘e motuhia e fetu‘utaki pea toki lava ‘o fakalea e me‘a ngāue teleletiō ‘i he 1 ho‘ata ‘o e ‘ahó ni, ‘o kamata ke ma‘u mai ha ngaahi fakamatala ke fai ‘aki a ngāue mo e vakai e ngaahi tokoni ke fakahoko.

‘Oku faingamalie pe ‘a Niua Fo‘ou, Tafahi, pea pehe ki Vava‘u mo Ha‘apai.

Kuo talaki fakapule‘anga ‘ihe ‘ahó ni ‘a e hoko ‘a e Vahe Fonua Niuatoputapu koe vahe fonua fakatu‘utamaki pea mo fiema‘u ki ai ha ngaahi tokoni fakavavevave.

Ko e ‘uhi ko e ‘ikai lava ‘o kakato ‘a e fetu‘utaki pea mo e fakavavevave ‘o e fiema‘u ke tau ‘ilo ki he lahi ‘o e maumau kuo hoko ki Niua Toputapu, na‘e nō ai ‘e he Pule‘anga ‘a e vakapuna ‘o puna ‘o vakai mei ‘olunga e maumau ‘oku hoko pea mo vaofi ange ‘a e fetu‘utaki letiō. Na‘e taki e folau ko ‘eni ‘e he Talekitā Ngāue mo e Talēkita Le‘ole‘o, ‘o e Potungāue Fetu‘utaki, pea kau atu ki ai e kau ngāue mei he ‘Ofisi Tokoni ki he Ngaahi Fakatamaki, kau faiongoongo, mo e kau ngaue ki he fa‘u lipooti mo e fakamatala.

Na‘a nau puna takai ‘i Niuatoputapu ‘i he taimi 4:40 efiafi ‘o e ‘ahó ni pea te nau toki foki mai mo ‘enau fakamatala ke fai ha ngāue ki ai ‘i he pooni.

‘E mavahe atu ‘a e vaka ‘o e Tau Malu‘i Fonua ‘a Tonga ‘i he taimi 7:00 efiafi ‘o e ‘ahó ni, fakataha mo e kau ngaue fakafaito‘o, kau ngāue ki he ‘uluaki tokoni, ngaahi teniti mo e ngaahi koloa ki he ‘uluaki tokoní. ‘Oku tu‘u tatali mo e vaka ‘e taha ‘o e Tau Malu‘i Fonua ‘a Tonga ki he folau hono hokó, hili ha fakataha palani ngāue ‘i he pooni.

Ko e ngāue leva ‘oku hoko ko e vakai ‘o e ngaahi tokoni ki he kāinga Niuatoputapu. E fai e fakataha kau ki he ngaahi ngāue ko ‘eni ‘i he pooni pea hoko atu ‘a pongipongi.

‘Oku fakataha fakavavevave ‘a e Kapineti ‘a ‘Ene ‘Afio ‘i he taimi hongofulu(10) ‘a uhu, koe hoko atu ai pe ‘o e ngaahi ngāue ki Niua Toputapu.

‘Oku tali lelei ‘ehe ‘ofisi Tokoni kihe Ngaahi Fakatamaki ha tokoni ‘e ala lava ‘ofa mai ‘aki. Ko e tokoni ‘oku fiema‘u taha ‘i he taimí ni koe vala mo e me‘a tokoni, pea kātaki ‘o tuku hake pe ‘i he ‘Ofisi Tokoni ki he Ngaahi Fakatamaki, Potungāue Ngāue, Vaololoa.

Ko ia ‘oku ou ‘oatu ‘a e ‘ofa ‘o e Pule‘anga ‘o ‘Ene ‘Afio kia kimoutolu hono kotoa ‘o Niuatoputapu. ‘Ofa ke mou ma‘u ha nonga pea ke tapuekina kimoutolu ‘e he ‘Eiki ‘i he taimi ‘o e fakatamaki kuo hokó.

Tu‘a ‘ofa atu.

NGATA'ANGA

Me'a 'a e 'Eiki Palemia Le'ole'o 'i he TV Tonga, 7:00 PM he 'aho 30 Sepitema, 2009

Last Updated ( Sunday, 21 August 2011 21:56 )  

Who's Online

We have 66 guests online